Zwjazkowa kanclerka zetka so z ministerskimi prezidentami šćěpiwa dla

Berlin (dpa/SN). Do dźensa planowaneho wjerškoweho zetkanja šćěpjenja dla je zwjazkowy minister za strowotnistwo Jens Spahn (CDU) před přehnatymi wočakowanjemi warnował. „Njemóžemy z jednym wjerškom samym hižo wjace šćěpiwa produkować“, rjekny wón wčera nowinarjam. Wažne je spóznać, hdźe su woprawdźite ćeže.

Tež zwjazk němskich farmapředewzaćow njeliči ze spěšnym rozrisanjom. „Fabrika za serum njeje žadyn knižny regal z wobchoda, kotryž móžeš spěšnje natwarić, rjekny prezident Zwjazka slědźacych producentow lěkow Han Steutel. „By-li to tak jednore było, bychmy to dawno  činili.“