Wolejbulistki Drježdźanskeho SC podležachu spočatk februara w pjatej partiji champions league cyłkej Developres Rzeszów před 750 přihladowarjemi w swójskej Margon-arenje z 19:25, 22:25 a 24:26. Tak nimaja chowanče trenarja Alexandra Waibla žanu šansu, docpěć štwórćfinale w mišterskej lize Europy.
Wolejbulistki Drježdźanskeho SC pohosćichu we wupředatej Margon-arenje načolnika champions league skupiny A Developres Rzeszów. Pólski mišter nastupi w měsće nad Łobjom ze štyrjomi top-hrajerkami swěta: ze serbiskej narodnej wolejbulistku a swětowej mišterku lěta 2018 Jelenu Blagojević, z přistajowarku pólskeho narodneho mustwa Katarzynu Wenerskej, z atletisce sylnej ameriskej smešowarku Karu Bajema a z Brazilčanku Brunu Honorio Marques. Drježdźanski trenar Alexander Waibl je do partije zwuraznił, zo čaka na jeho chowanče „herkulesowy nadawk“.
