Skromny spočatk w lěće 1983
Před 40 lětami bě z třomi wučerskimi cyłkami mjeztym najpopularniši wolejbulowy turněr w Serbach, wurisanje wo pokal Zwjazkoweho předsydstwa Domowiny, startował. Štwórtk popołdnju, 24. februara 1983, zetkachu so w nowej sportowni Šule Ćišinskeho w Pančicach dwě pedagogowce a šěsnaće pedagogow Serbskeje šule Ralbicy, Serbskeho wučerskeho wustawa Budyšin (SWW) a domjaceho kubłanišća, zo bychu při wysokim saku wuhrali prěnjeho dobyćerja pućowanskeho pokala Domowiny. Znaty serbski seniorowy běhar Jurij Nuk z Budyšina, tehdy hrajer mustwa SWW, wopisa kónc februara w Nowej Dobje wotběh turněra a poda rezultaty. Tak bě sportowy wučer Stefan Rjeda ze Šule Ćišinskeho hłowny organizator a po horcym boju přijima Pančičanski kapitan Jan Rjelka z rukow njeboh Bena Pjetaša, tehdy wotrjadnik w sekretariaće Zwjazkoweho předsydstwa Domowiny, drohotny pokal. Druhe městno wobsadźichu Budyscy a třeće sportowcy a sportowče z Delan.
Wuwiće turněra k rekordnemu wobdźělenju
