Jutře so štryridnjowski kulturny wjeršk lěta zahaji – wulke předwjeselo
Budyšin/Chrósćicy (SN/at/BŠe/mb). Jutře zahaji so XIV. mjezynarodny folklorny festiwal „Łužica“ ze zarjadowanjemi w Budyšinje. Zazběh dožiwjeja najmłódši wopytowarjo w Němsko-Serbskim ludowym dźiwadle. Woni móža so wjeselić na rejwansku skupinu SLA „Łužičanku“, dorost Serbskeho folklorneho ansambla Wudwor, na skupinu młodych Ukrainjanow, kotraž je njedawno hakle pólski mejski swjedźeń „Majówka“ w tudyšim Kamjentnym domje wobohaćiła, a na dorostowu skupinu słowakskeho ansambla Gymnik.
Pódlanski efekt zažneho wustupa młodych Słowakow je, zo witaja Gymnik hižo dźensa wječor jako prěnje wukrajne ćěleso w sprjewinym měsće. „Wjetši dźěl wukrajnych hosći pak jutře přijědźe“, přeradźi Claudia Knoblochec z Domowinskeho zarjada. Hakle pjatk wočakuja měšanu skupinu Ihna z Erlangena, chilsku skupinu Pehuén z Frankfurta nad Mohanom kaž tež cyle krótkodobnje band NDUNGU KINU z Lipska z afriskimi bubonami a rejemi.