Při Krabatowym kamjenju nastawaja skulptury, předewšěm ze zornowca

Miłoćicy (SN/MiR). Wosom wuměłcow wobdźěli so lětsa na 17. mjezynarodnej rězbarskej dźěłarničce w Miłočanskej skale „Při Krabatowym kamjenju“. Wot zašłeje póndźele tam dwě wuměłči a šěsć wuměłcow mócnje do kruteho zornowca kaž tež duba bija, kałaja a material zhładkuja. „Njeje było cyle lochko, dźěłarničku zwoprawdźić“, zwurazni předsyda towarstwa Kamjenjak Hubert Lange, „dokelž je financowanje projekta lěto a ćeše.“ Nimo Załožby za kulturu Sakskeje so wosebje tež Załožba za serbski lud na tym wobdźěli, projekt pjenježnje zaručić. Přiwšěm je tež lětsa zaso mały team dźěłarničku z mjezynarodnym widom přihotował.