Hrajna doba z wobšěrnym, na wudźeržliwosć wusměrjenym programom

Budyšin (SN/bn). Prěni wjeršk hrajneje doby 2023/2024 Serbskeho ludoweho ansambla stej takrjec před durjemi. Zapřichodny pjatk mjenujcy předstaja balet, chór, solisća kaž tež orchester SLA kaž tež a hóstny chór Budyšin pod hesłom „Wójna a ...“ prěni dźěl „inscenowaneho oratorija“ Bjarnata Krawca a Michała Nawki jako prěnju z dohromady dźewjeć prapremjerow sezony prěni raz. Inscenaciju zamołwja intendant SLA Tomas Kreibich-Nawka, instrumentowanje originalneje partitury za „sola, chór a klawěr“ je Hans-Peter Preu zdźěłał. Kaž intendant na nowinarskej konferency wčera wuzběhny, „jedna so wo jednu z třoch planowanych produkcijow, z kotrymiž so takrjec trochu z wuteptanych pućow dotalnych ansamblowych programow zdalujemy“, a připowědźi dale komornohudźbny kruch „Prjedy hač woteńdźeš“ po motiwach Róže Domašcyneje a Maćija Bulanka kaž tež z hudźbu mjez druhim Měrćina Weclicha a rejowane dźiwadło „Dych žiwjenja“ wo „serbskich nałožkach kołowokoło naroda a smjerće“.