Domowina chce Europeadu 2024 wuhódnoćić – wulki dźak přiwisnikam
Flensburg (SN/MkWj). Europeada – koparske mišterstwo europskich narodnych mjeńšin, je zakónčena. 24 muskich a dźewjeć žónskich mustwow ze wšeje Europy je so cyły tydźeń w Schleswigsko-Holsteinskej a Danskej wubědźowało. Hosćićel bě lětsa kónčina „mjez morjomaj“. Tam maja, štož je pola nas mało znate, štyri narodne mjeńšiny: Dansku mjeńšinu w Němskej, němsku w Danskej, Frizow a Romow. Tuž so tu w mjeńšinowych prašenjach derje wuznaja. Patronatstwo přewzałoj staj mjez druhim zwjazkowy minister za hospodarstwo Robert Habeck (Zeleni) a předsydka kónčiny južneje Danskeje, Stephanie Lose. Hłowny zarjadowar bě Federalistiska unija europskich narodnych mjeńšin FUEN, w kotrejž su tež Serbja zastupjeni. Europeada wotměwa so stajnje po štyrjoch lětach.
Serbja běchu so dołho na sportowy wjeršk přihotowali a dwě mustwje zestajeli. Na kóncu zdobychu sej mužojo po horcej hrě 11. městno. Žónske mustwo wobsadźi w bilancy sedme městno. Wobě mustwje stej so zaso derje nawróćiłoj.
