Wudobytk němskich atletkow a atletow při para­lympiskich hrach w Parisu bywa dale a wjetši. Sobuzamołwitaj za to staj Elena Krawzow a Taliso Engel, kotrajž staj sebi wobaj złoto w płuwanju wudobyłoj. W 19.07 hodź. dótkny so Taliso Engel štwórtk wječor po wuběrnym wubědźowanju w płuwanju na hrudźi přez 100 metrow jako prěni kromy basenka. Z 2,93 sekundami předskoka doby 22lětny swoje druhe paralympiske złoto w tutej distancy. Jenož 24 mjeńšinow pozdźišo wotmě so w arenje La Defence hišće raz podobny podawk: Na čarje čisło štyri wotsadźi so znowa sportowča z němskimi barbami na kupanskej kapje. Tutón raz bě to Elena Krawzow, kotraž wubědźowanje samo 3,08 sekundow zašo hač konkurencu zakónči. Dwójce złoto za Němsku w najkrótšim času – to ­zdokonještaj Engel a Krawzow hižo před třomi lětami w Tokiju. Elena Krawzow ­polěpši w finalu swójski swětowy rekord z lěta 2019. 1:12,54 mjeńšiny – tak spěšnje njeje žona w klasy SB12 distancu přez 100 metrow na hrudźi hišće ženje płuwała.