Šesty wólnočasny wolejbulowy turněr serije „top-sydom“ w Radworju dobychu prěni raz hrajerki a hrajerjo mustwa Sokoła Ralbicy/Hórki před Budyskim Serbskim gymnazijom a Sportowej jednotku Chrósćicy.

Po lěćnej přestawce dojědźe sej sydom wólnočasnych zastupnistwow do Radworja, zo bychu w tamnišej sportowni „Slavija“ dobyćerja při wysokim saku zwěsćili. Hłowny organizator wječora Syman Hrjehor wjeseleše so při wotewrjenju hnydom dwójce. Sprěnja běchu wšitke cyłki tuteje serije přitomne a zdruha bě podźěl wolejbulistkow z třinaće hrajerkami znowa wysoki.

Po dwuhodźinskim boju, w kotrymž hraješe kóždy přećiwo kóždemu stajnje 10 mjeńšinow, wudobychu sej Kulowscy sportowcy z jednym dobyćom sedme městno. Tež wólnočasni wolejbulisća Viktorije Worklecy jenož jónu dobychu, mějachu pak při wuličenju małkich dypkow 16 minusowych mjenje hač Žołto-módri Kulow. Kompliment do Worklec, wšako startowachu tónraz samo ze štyrjomi hrajerkami.