TSV Kundračicy –
Viktoria Worklecy I 3:1
(25:22, 21:25, 25:19, 25:22)
Za Viktoriju Worklecy zasadźene běchu: Anja Biela, Diana Hajnec, Xenia Koberec, Marina Köhler, Stefanie Köhler, Klara Kralec, Jenny Otto, Constance Pötschke, Rejzka Rawšec, Anja Schmidtowa, Kathrin Spiesec, Hannah Šustrec, Jana Žurowa. Trenarka: Daniela Kralec
Kónc tydźenja dojědźechu sej wolejbulistki prěnjeho zastupnistwa Viktorije Worklecy do Habrachćic, zo bychu swoju předposlednju hru aktualneje sezony přećiwo žonam z Kundračic wuhrali. Wosebitosć tutoho hrajneho dnja bě, zo so dwě hrajerce posledni raz aktiwnje na dypkowych hrach wobdźělištej a dalša hrajerka mustwo nachwilnje wopušći. Hrajny dźeń bě za nje takrjec rozžohnowanje.
Žony z Kundračic su za Worklečanki hižo dołho znaty kontrahent. W zašłosći njejsu sej mjez sobu ničo darili a kóždy raz wotmě so na parkeće horcy bój, štož pokazuje tež posledni dypkowy staw mjez mustwomaj na zetkanju we Worklecach: Ze 27:25, 23:25, 24:26 a 22:25 móžachu so Kundračanki snadnje přećiwo Worklečankam přesadźić. Sobotu tydźenja mějachu Kundračanki domjacu lěpšinu.
