Wjac hač 1 000 sportowcow – w jubilejnym lěće města je spočatk meje w Kamjencu telko sportowcow kaž hišće ženje na Łužiskich kćenjowych běhach startowało.

Mjez nimi běchu wjacori serbscy wólnočasni sportowcy. Premjera běše duatlon we wobłuku triatlonoweje regionalneje ligi wuchod. Z tym bě sportowy podawk tež za mjezami regiona a Sakskeje atraktiwny.

Lětsa, w lěće 800. jubileja Kamjenca, bě to hižo 26. raz, zo so Łužiske kćenjowe běhi wotměchu. Wuchodosakske płuwanske towarstwo (OSSV), Triatlonowy team Łužica (TTL) a město Kamjenc běchu wubědźowanja organizowali. Běchu je pod hesło „800 +“ stajili a chcychu ličbu 800 wobdźělnikow překročić. Z cyłkownje 1 034 sportowcami w 13 wšelakich wubědźowanjach su to šwarnje překročili. Hižo loni zličichu rekord, jako nimale 900 sportowcow nastupi.