W pjatym tydźenju Sakskich prózdnin přewjedźechu tradicionalny prěni lěćny camp FC Energije Choćebuz, na kotrymž so Paul Čuška z Hornjeje Łužicy wobdźěli. 58 młodych koparkow a koparjow dožiwi intensiwny tydźeń połny treninga a njezapomnitych wokomikow.

Na ležownosći DFB w Choćebuzu witachu štyrjo trenarjo a nawoda campa, něhdyši profi Toralf Konetzke, motiwowanych wobdźělnikow. Kóždy młody kopar a koparka dósta kompletnu drastu FC Energije. Dźěći rozdźělichu so po starobje do štyrjoch skupin, kotrež mějachu mjena znatych Choćebužanow: Wollitz, Juckel, Tallig a Tattermusch. „Prěnjotnje je nam wjeselo při kopańcy a kontakt mjez dźěćimi ze wšelakich towarstwow wažny“, rozłoži Toralf Konetzke. Dale wón praji: „Naš plan za cyły tydźeń je chětro połny.“ A to wón tež bě: Nimo intensiwnych treningowych jednotkow na štyrjoch stacijach nastupajo hrajnu formu, koordinaciju, přihraće a třělenje, stejachu tež turněry, wulět do trampolinoweho domu a test koparskeho znamješka DFB na programje.