W minjenej hrajnej dobje nastupichu hrajerjo wokoło trenarskeje dwójki Frank Šnajder a Kai Frenzel znowa w stafli I juh, štož bě jara husto z dalokimi jězbami zwjazane. Cil wšěch wobdźělenych zamołwitych a hrajerjow rěkaše: Tak zahe kaž móžno zdźerženje klasy zawěsćić a so nimo toho w hornjej połojcy tabulki etablěrować. Zwostaće w lize drje móžachu hrajerjo zwoprawdźić, naposledk pak wuskoči w kónčnym wotličenju jenož přesłapjace 10. městno.

Dypki: Po 26 hrach docpěchu Pančičanscy koparjo z wosom dobyćemi, pjeć njerozsudnymi hrami, 13 poražkami a negatiwnym wrotowym poměrom 45:54 drje 29 ličakow. Sportowe sudnistwo Zapadołužiskeho koparskeho zwjazka pak tutón staw wo tři dypki přemało aktiwnych sudnikow dla redukowaše, z čimž mějachu na kóncu jenož 26 dypkow.

Přihladowarjo: Při hrach na domjacym trawniku sćěhowaše přerěznje 54 přihladowarjow hram. Hnydom na druhim hrajnym dnju bě jich ze 105 najwjace, a to w serbskim derbyju přećiwo druhemu mustwu SJ Chrósćicy. Wrota za domjacych docpěštaj Florian Kreuz (10., 22.) a Ali Eldor (48.). Za Chróšćanow bě Franziskus Wornar (19.) trjechił.