W napjatym prěnim kole wokrjesneho pokala bě so koparska młodźina C Sokoła Ralbicy/Hórki minjenu njedźelu w stadionje J. G. Fichte w Ramnowje přećiwo hrajnemu zjednoćenstwu FSV Bretnig-Hauswalde/ST 1910 Drohotka Ramnow přesadźiła a z tym druhe koło docpěła.

Hosćićeljo z Ramnowa hižo w 13. min. nawjedowachu, tola hosćo njedachu so zatrašić. Jenož dwě mjeńšinje pozdźišo poradźi so Róžeńčanej Johanej Šnajderej zasłužene wurunanje. W 20. min. docpě Worklečan Domenik Wolf samo 2:1. Ramnowčenjo pak hru z wrotami w 36. a 58. min. znowa na swoje dobro zwjertnychu. Tola hosćo z Ralbic njespušćichu. Po tym, zo Domenik Wolf jenož snadnje na wrotarju zwrěšći, wuži Róžeńčan Feliks Handrik šansu k wurunanju 3:3. Rozsudny wokomik nasta krótko do kónca. Derje hraty nadběh Ralbičanow móžeše so jenož z ruku napřećiwnika zadźeržeć, štož měješe čerwjenu kartku a pokutny kop jako konsekwencu. Kapitan Johann Šnajder wobchowa čuwy a přeměni jědnatku jasnje ke kónčnemu stawej 4:3 za Sokołow.

Ralbičanscy hrajerjo zaćahnychu tak zasłužbnje do přichodneho koła. We wosmifinalu hraja přećiwo Wojerowskemu FC.