ST 1922 Radwor – ST Lubuš 1:2 (0:1)

Za Radworske mustwo zasadźeni: Pěčak – B. Grubert, M. Grubert, Schäfer (79. Elsner), Wjesela, Adam (85. Lawka), Wencl (85. Buša), Nuk, Wjeńka (56. Hetaš), Glück­lich, Dźisławk (54. Mička)

Z mustwom z Lubuša je Radworski cyłk w dalšej domjacej hrě aktualneho třećeho tabulki witał a steješe při tym před naročnym nadawkom. Po naposledk ćežkich tydźenjach chcyše mustwo skónčnje prěnje domjace dobyće tohole lěta docpěć, namaka pak so jenož ćežko do hry. Partija započa so bjez naspomnjenja hódnych akcijow. Radworčenjo drje bul časćišo wobsedźachu, tola hosćo z Lubuša wuhrachu sej lěpše šansy na wrota. Hižo w 13. min. hosćo nawjedowachu. Třělwa z wjetšeje distancy namaka z trochu zbožom a njedźeržomnje puć do wrotow k 0:1 (13.). Po tym bě hra skerje njespektakularna. Radwor měješe so ofensiwnje dale ćežko a dóńdźe, kaž hižo w minjenych partijach, jenož k mało wotzamknjenjam před wrotami. Defensiwnje pak mustwo stabilnje steješe, tak zo měješe tež Lubuš najprjedy lědma ­dalše jasne móžnosće. Hru postajowachu předewšěm intensiwne dwuboje w srjedźnym polu.