Składnostnje jutřišeje prpremjery oratorija „Wulkotna woda“ w 19.30 hodź. w Budyskej „Krónje“ je so Julius Paška z dirigentku 1. serbskeje kulturneje brigady Judit Kubicec rozmołwjał.

Oratorij z tajkim wulkim mnóstwom sobuskutkowacych trjeba sylnu zhromadnosć wšitkich wobdźělenych. Kak su proby z brigadnicami a brigadnikami dotal wotběželi?

Sylnu zhromadnosć wšitkich sobuskutkowacych wězo trjebamy. Tutu smy wčera hakle tak prawje nazhonili, jako smy prěni raz z komornej filharmoniju Serbskeho ludoweho ansambla (SLA) zwučowali. Hižo wot spočatka lěta so brigada z tutym oratorijom zaběra, štož bě tež trjeba, dokelž je twórba Měrćina Weclicha woprawdźe cyle hinaša hač zwučene oratorije. Wopřija wužadace teksty, wužadacu stilistiku a je z wužadacej harmoniju wudebjena. Je to wšitko chětro njezwučene a ćim powabnišo. W Hejnicach a w Colditzu smy so koncentrowani tutomu dźěłu wěnowali a smy so oratorijej přibližili. Nadźijam pak so, zo škrički wot sobuskutkowacych z jewišća na přihladowarjow přeskoča. Škrički wjesela, wulkeje koncentracije a wědomja wo temje.