Berlin (dpa/SN). Zwjazkowy sejm zaběra so tónle tydźeń hnydom na wjacorych wosebitych posedźenjach z raciju přećiwo reichsbyrgarjam. Tak je frakcija unije próstwu stajiła, zo měli so dźensa w nutřkownym kaž tež prawniskim wuběrku z temu zaběrać. Nimo toho tłóča Zeleni na to, zo so nětko wotkryte plany skupiny w aktualnych hodźinach w plenumje zwjazkoweho sejma tematizuja.

„Teroristiska syć je po tuchwilnym přepytowanskim stawje zaměrnje nadpady na Němski zwjazkowy sejm a z tym na wutrobu demokratije přihotowała“, parlamentariska jednaćelka frakcije Zelenych Irena Mihalic minjeny pjatk wu­zběhny. Na přichodnych posedźenjach njeměli jenož wo běžnych přepytowanjach rěčeć, ale tež wo politiskich kon­sekwencach kaž tež wo wěstotno-politiskich naprawach. Politikarjo amploweje koalicije chcedźa spočatk tydźenja w swojich frakciskich předsydstwach wo aktualnej hodźinje rozsudźić.