Ultimatum Trumpa zahajeny
Washington (dpa/SN). Dźesać dnjow trajacy ultimatum prezidenta USA Donalda Trumpa nastupajo wyše cła za ruskich wikowanskich partnerow je zahajeny. „Dźesać dnjow wot dźensa“, rjekny Trump wčera wječor žurnalistam w lětadle ze Šotiskeje do USA. Po tutym puću chce Trump Rusku k měrowym jednanjam z Ukrainu nuzować. Poprawom bě Trump Ruskej 50 dnjowski ultimatum stajił, pozdźišo pak tole na „dźesać do dwanaće dnjow“ přikrótšił.
Kabinet etat 2026 schwalił
Berlin (dpa/SN). Zwjazkowe knježerstwo je dźensa naćisk zwjazkoweho etata 2026 wobzamknyło. Budget předwidźi wudawki dobrych 520 miliardow eurow a nowe kredity 174 miliardow eurow. Zwjazkowy financnym minister Lars Klingbeil (SPD) je plany w Berlinje přestajił. Centralne ćežišća knježerstwa su po jeho słowach mjez druhim inwesticije za spěšny rozrost hospodarstwa a wjace dźěłowych městnow kaž tež za wěstotu.
Söder hrozy wupowědźić
Pomocnicy čakaja na lěpše wjedro
Islamabad (dpa/SN). W horinach Karakoruma w Pakistanje znjezboženu bywšu němsku biatletku Lauru Dahlmeier njejsu dotal hišće wuchowali. Tole zdźěli rěčnik městneho Alpoweho towarstwa a zamołwiteho ekspediciskeho předewzaća powěsćerni dpa.
Wuchowansku akciju za 31lětnu dyrbjachu wčera wječor ćmy dla přetorhnyć. Přičina su wichory a špatne wjedro z kurjawu. Dźensa rano chcychu nazhonitych krosnowarjow na horu pósłać. Dahlmeier poda so póndźelu z dalšej krosnowarku na 6 069 metrow wysoku horu Laila Peak, jako ju na wysokosći 5 700 lawina kamjenjow trjechi. Wot toho časa nimaja wjace kontakt k njej.
Zranjeni po zemjerženju
Woidke wo namjet renty dla njerodźi
Podstupim (dpa/SN). Braniborski ministerski prezident Dietmar Woidke (SPD) wyšu rentowu starobu wotpokazuje. „Za mnohich ludźi, kotřiž ćežko dźěłaja kaž dróhotwarcy, třěchikryjerjo a dalši, njeje to prosće móžno“, rjekny Woidke Podstupimskim nowinarjam. Štóž sej tajke něšto žada, ludźi znjeměrnja, wón rjekny. Zwjazkowa ministerka za hospodarstwo Katherina Reiche (CDU) je minjeny kónc tydźenja debatu wo tym nastorčiła.
Demografiskich wuwićow a přiběrace wočakowanje dołheho žiwjenja dla pak je to trěbne: „Žiwjenski dźěłowy čas dyrbi přiběrać“, rjekny politikarka CDU Frankfurtskim nowinarjam. „Dyrbimy wjace a dlěje dźěłać“, wona zjima. Zakonsku mjezu za rentu bjez wotćahow wot lěta 2012 hač do 2031 krok po kroku wot 65 na 67 lět pozběhnu. Rjady z hospodarstwa namjet Reiche podpěruja.
Zwjazkowe knježerstwo zwyšenje rentoweje staroby njeplanuje. Město toho maja dźěłaćerjo fleksibelniši při přechodźe z powołanskeho žiwjenja do renty być.
Tež London pomha Palestinje
Wulka Britaniska zwyša ćišć na Israel – Němska wočaknje
London/Gaza (dpa/SN). Wulka Britaniska je připowědźiła, zo Palestinu jako stat připóznaje, jeli israelske knježerstwa spěšnje wažne kročele njezwoprawdźi. Wone ma tuchwilne połoženje w Gazaskim pasmje skónčić a so k dołhodobnemu měrej wuznawać. Tole je premierminister Keir Starmer na posedźenju knježerstwa připowědźił. Wčera bě francoski prezident Emmanel Macron samsnu diplomatisku kročel Parisa připowědźił a tak wjele kedźbnosće zbudźił.
Fachowcy wopisuja situaciju w zawrjenym a zničenym pobrjóžnym pasmje, w kotrymž bydlitej dwaj milionaj Palestinjanow, mjeztym jako katastrofalnu. Zamołwity za to je Israel. Kraj zastaranje ludnosć ze žiwidłami blokuje, zo njemóhła so islamistiska Hamas ze składow pomocnych srědkow posłužować.
Israelske wonkowne ministerstwo je nastork Londona z raznymi słowami wotpokazało. Připóznaće Palestiny by mytowanje Hamas było a prócowanja wo přiměr w Gazaskim pasmje za pušćenje zastajencow haćiło. To w Jerusalemje zdźělichu.
Stara zasada zwrěšćiła
To a tamne (30.07.25)
W kupanskich drastach po měsće běhać je we woblubowanym francoskim pobrjóžnym městačku Les Sables-d‘Olonne nad atlantiskim morjom přichodnje zakazane. Měšćanosta Yannick Moreau so hižo dołho „njepřistojneho zadźerženja“ dla mjerza. Tuž je na času, zo to jasnje zakazaja. Wotnětka njesměš wjac połnahi abo jenož w kupanskich cholowach po dróze běhać. Za to hrozy pokuta 38 eurow.
W Grimmje je wčera při zwučowanju helikopter zwjazkoweje wobory znjezbožił. Při tym staj wobaj pilotaj swoje žiwjenje přisadźiłoj. Mašinu chcychu dźensa z Muldy wućahnyć. Za dalšej wosobu hišće pytaja, zakitowanski minister Boris Pistorius (SPD) na městnje njezboža zdźěli. Wrak leži wosrjedź rěki. Pomocnicy dyrbja najprjedy raz bencin wotčěrać, kotryž je wuběžał. Potom chcedźa, powostanki helikoptera wuzběhnyć.
Wabja serbsce za spěšny internet
Zapad měł wojakow zapłaćić
Kiew (dpa/SN). Ukrainski prezident je zdźělił, zo trjeba jeho kraj kóždolětnje wjace hač 65 miliardow eurow. „Ukraina dyrbi deficit 40 miliardow eurow wurunać. Přidatnje płaći produkcija ukrainskich trutow 25 miliardow eurow“, Zelenskyj internetnje zdźěla. Nimo toho sej wón žada, zo měł zapad mzdu ukrainskich wojakow zapłaćić, wšak woni swobodu wšeje Europy zakituja. Ukrainscy wojacy na fronće dóstanu 2 400 eurow brutto měsačnje.
Nabožina přećiwo ekstremizmej
Berlin (dpa/SN). Dźěłarnistwo za kubłanje(GEW) žada sej islamsku nabožnu wučbu na wšitkich šulach Němskeje. Zaměr je, šulerjam wědu wo swójskej wěrje a wo druhich nabožinach posrědkować, rjekny předsyda dźěłarnistwa Gerhard Brand nowinarjam. Wobstejace modelowe pospyty měli so rozšěrić a powšitkownje poskićeć. Zwjazk wučerjow Němskeje namjet podpěruje. Nabožna wučba móže skutkowny srědk přećiwo ekstremistiskim wliwam być.
Trump so wobara
