Moskwa (dpa/SN). Ruski prezident Wladimir Putin ma direktne rozmołwy z Kijewom wo rozšěrjenju moratorija nastupajo nadpady na wuzwolene objekty za móžne. Ruska je registrowała, zo spyta Ukraina nastupajo přiměr iniciatiwu přewzać, zo by dalše objekty před nadpadami škitała, rjekny Putin ruskim žurnalistam. „Dyrbimy wo tym rozmyslować.“ Putin w tym zwisku njewuzamkuje, direktne rozmołwy z Ukrainu zahajić. Dotal wotměwaja so rozmołwy indirektnje z pomocu pósłancow.

Ruska je minjeny čas tež ciwilne objekty nadběhowała, Putin přizna. Konkretnje mjenowaše wón nadpad na město Sumy, při kotrymž bě 35 ludźi žiwjenje přisadźiło. Putin pak dale twjerdźi, zo měrješe so nadpad z raketami na zhromadźiznu ukrainskich oficěrow w měšćanskej hali. Tuž bě ataka woprawjena.

Runočasnje 72lětny wot njeho wukazany jutrowny přiměr pozitiwnje hódnoćeše. Ukraina je přiměr po słowach Putina 5 000 króć raniła, Ukraina wumjetuje Ruskej 3 000 ranjenjow přiměra.

Vatikan hotuje so na chowanje zemrěteho bamža Franciskusa

Rom (dpa/SN). Po smjerći bamža Franciskusa su so dźensa we Vatikanje kardinalojo zešli, zo bychu wotběh žarowanskich swjatočnosćow wobzamknyli. Zemrěty bamž steji tuchwiluw kapałce swojeje rezidency na marach. Chowanje bamža je přichodnu sobotu předwidźane.

Prawdźepodobnje jutře chcedźa ćěło do Pětroweje cyrkwje w Romje donjesć, zo móhli so wěriwi tam z nawodu katolskeje cyrkwje rozžohnować. K tomu wočakuja statnikow ze wšeho swěta. Tež prezident USA Donald Trump je swój wopytwe Vatikanje připowědźił.

Franciskus bě wčera, jutry póndźelu, po dołhej ćežkej chorosći w swojej rezidency 88lětny zemrěł. Po informacijach Vatikana je bamža boža ručka zajała. Nalěto bě bamž po ćežkim zahorjenju płucow 38 dnjow w chorowni přebywał.

Pochować nochcedźa rodźeneho Argentin­jana po jeho wuraznym přeću w Pětrowej cyrkwi, ale w bazilice Santa Maria Maggiore wosrjedź Roma. Bamž sam bě postajił, zo ma so žarowanska swjatočnosć w skromnej formje přewjesć. Pochować maja jeho w jednorym, drjewjanym kašću.

Franciskus njebě wony wulki teologa a nabožny teoretikar kaž jeho předchadnik Benedikt XVI. Jemu pobrachowaše tež přemóžacy charisma Jana Pawoła II. Tola Franciskus bě stajnje rady mjez ludźimi. Wón modleše so ze staršimaj, kotrajž runje wo swoju pjećlětnu dźowku žarowaštaj. Wón žortowaše z dźěćimi, kotrež w awdiencnej hali po jewišću skakachu a so nad pisanymi uniformami šwicarskich gardistow dźiwachu. Wón wobjimaše chorych a zbrašenych, wón měješe stajnje chwile za wšěch.

Wosebje prěnje tydźenje zastojnstwa bamža Franciskusa su so mi do pomjatka zaryli. Z hejatosću so spjećowaše, w pyšnych rumnosćach bamžowskeho palasta bydlić. Wón wobjedowaše z přistajenymi Vatikana w jich jědźerni a so jich prašeše, što cyły dźeń činja. A ze swojeje namołwu „Zmužitosć za běłu chorhoj“ w zwisku z wójnu w Ukrainje njeje sej jeničce přećelow zdobył. Jako tajki zańdźe wón do stawiznow. Marko Wjeńka

Kaž w filmje je muž w badensko-württembergskim Ravensburgu před swojej mandźelskej ćěkał, kotraž bě jeho z lubku w hotelu lepiła. Muž spleće sej z płachtow powjaz, zo by so z woknom hotela dele pušćił. Při tym pak so wotsuny a padny dźesać metrow hłuboko na třěchu twarjenja. 66lětneho dowjezechu zranjeneho do chorownje. Hač je jemu mandźelska mjeztym wodała, njeje znate.

Njewšědnu rubiznu wupytali su sej paduši w Lubiju. Z ležownosće pokradnychu w nocy na sobotu dwě bagrowej łopaći­. Policija trochuje hódnotu hromadźe na 3 500 eurow. Do toho su skućićeljo płót ležownosće namócnje přewinyli. Zastojnicy kriminalneje policije móžachu wšelake slědy zawěsćić. Swědkojo, kotřiž su něšto podhladneho widźeli, su prošeni, so pola policije přizjewić a k rozrisanju njeskutka přinošować.