To a tamne (04.08.16)
Chětro njezbožowny dźeń měješe 42lětny wčera w porynsko-pfalcskim Frankenthalu. Najprjedy přizemi zapozdźeny a bjez wačoka na lětanišću. Doma so při telefonje z přećelku zwadźi, na čož roznjemdrjeny do špihela dyri a sej ruku rozrěza. Tak sydny so do awta a jědźeše do chorownje. Spodźiwne wašnje jězdźenja pak pěškej napadny, kiž zawoła policiju. Ta zwěsći 0,9 promilow alkohola. Jězbna dowolnosć je tuž na měsac fuk. Doma muž pytny, zo bě so sam wuzamknył. Tuž dyrbješe pinčne wokno rozbić, zo by do swojeho bydlenja přišoł.
Z busom je jědnaćelětny samlutki po Ingolstadće jězdźił. Po informacijach policije bě so za wodźidło parkowaceho busa sydnył a wotjěł. Pěšcy wołachu policiju, kotraž małeho busoweho šofera zadźerža a maćeri přepoda. Zastojnikam hólčec rjekny, zo bě klučik busa namakał a sej jón za „wulki dźeń“ wobchował.
Prewentiwna naprawa
Berlin (dpa/K/SN). Po zwrěšćenym pospyće puča w Turkowskej je Zwjazkowa wobora na zepěranišću NATO w İncirliku zesylniła prewentiwne wěstotne naprawy. Na bazu němskich wojakow lětaja krótkodobnje jenož mašiny, kotrež wobsedźa raketywotwobaranske systemy. Zwjazkowa wobora je so tak přizamknyła wotpowědnym kročelam USA a dalšich partnerow.
Starosća so Aleppa dla
Mnichow (dpa/SN). Pomocna organizacija Lěkarjo swěta starosći so medicinskeje situacije ludźi w sewjerosyriskim měsće Aleppo dla, wo kotrež zasakle wojuja. Tohodla móža sej tamniši wobydlerjo lědma lěki abo druhe žiwjenjawažne wěcy wobstarać, kaž organizacija dźensa w Mnichowje zdźěli. Wosebje raznje šwikaše w tym zwisku zaměrne nadpady na medicinske objekty. Tak su minjeny čas w Aleppje dwě ambulancy, šěsć chorownjow a dźěćacu chorobnu staciju zdźěla abo dospołnje zničili.
Wjace chorych dźěławych
Pomocy wosebje potrěbnym dźěćom je sakska ministerka za ...
Grjekska žada sej alternatiwny plan
Prezident USA Obama: Trump je njekmany
Ludomordarstwo wopominali
„Riskantnu praksu skónčić“
Zeleni maja składowanje popjeła z milinarnjow za njezakonske
Drježdźany (dpa/SN). Zeleni so w Sakskej praktikowanemu składowanju popjeła z brunicowych milinarnjow spjećuja. „Sym Lipšćanskemu statnemu rěčnistwu skóržbu přećiwo njeznatym zapodał“, rjekny fachowc za energijowe naležnosće w frakciji Zelenych krajneho sejma Gerd Lippold wčera w Drježdźanach. Wón powołaše so při tym na wuslědk najnowšeho prawniskeho posudka, kotryž běchu Zeleni skazali.
Po informacijach Lippolda wobsahuje popjeł ćežkometale kaž kopor, kadmium, chrom, cynk, wołoj, nikl, žiwe slěbro a talium. Najebać to njeskładuja wotpadki kaž w druhich krajach na deponijach, ale w přirodźe. Tak móhło k zanjerodźenju dnowneje wody dóńć. „Tule riskantnu praksu měli najspěšnišo skónčić.“
Hišće lětsa zwučować
Sobu financować
Berlin/Budyšin (SN). Zwjazkowe knježerstwo je dźensa w Berlinje nowy zwjazkowy plan wobchadnych pućow wobzamknyło. Tam je elektrifikacija čarow Drježdźany–Zhorjelc a Kamjenica–Lipsk do najsłabšeje kategorije „potencielna potrjeba“ zastopnjowana. Ze sakskeho wida njeje to po słowach zapósłanče Zwjazka 90/Zelenych w krajnym sejmje Katje Meier „přiležnosć wulce wyskać“. Wona widźi wobchadneho ministra Martina Duliga (SPD) nětko jako přisłušneho za to, so pola Němskeje železnicy za tejle wažnej infrastrukturnej předewzaći doraznje zasadźić. „Zo bychu so šansy zwyšili, čarje Drježdźany–Zhorjelc a Kamjenica–Lipsk elektrifikować, měło sakske knježerstwo železnicy sobufinancowanje namjetować“, poruči Meier. Wšako su druhe zwjazkowe kraje kaž Schleswigsko-Holsteinska, Bayerska abo Badensko-Württembergska sebi samym wažne železniske projekty sobu financowali, abo činja to aktualnje.
Ze zahajenjom nowotwara železniskeho mosta nad Zeppelinowej w Budyšinje twori so wažne wuměnjenje za elektrifikaciju zwiska Drježdźany–Zhorjelc.
To a tamne (03.08.16)
Wulět ćeknjeneje kruwy w Pfalcy je so po štyrjoch tydźenjach skónčił. Skoćo, kotrež słucha na mjeno Johanna, su wčera w Kaiserslauternje popadnyli. Kruwa bě so na ležownosć zawoda zabłudźiła. Jako zawodna wohnjowa wobora dojědźe, wona spočatnje ćekny. Sobudźěłaćerjo pak móžachu ju na wobhrodźenu płoninu ćěrić. Johanna bě spočatk julija z rězarnje ćeknyła a policiju zas a zaso za nós wodźiła. Nětko chcedźa ju na statok smilnosće dowjezć, kaž rěkaše.
Camping na njewšědnym městnje je we wokrjesu Teltow-Fläming zasadźenje policije zawinił. Ludźo běchu ju informowali, dokelž někotre wosoby na kromje B 96 za campingowym blidom sedźo jědźachu. Policija wšak móžeše pad wujasnić: Wulětnikarjam bě so awto skóncowało. Čakajo na pomocnu słužbu činjachu to najlěpše ze situacije.
