Za kuchinskim blidom nastawaja najlěpše­ rozmołwy – rozmołwy na samsnej­ runinje. Z wosebitym zarjadowanjom­ chce sakski hospodarski­ minister Martin Dulig (SPD) dowěru na bazy skrućić.

Budyšin (SN/BŠe). „Sydńće so ze mnu za blido­ a powědajće mi wo swojich starosćach.“ Takle namołwi Martin Dulig (SPD) ludźi wčera na Budyskich Žitnych wikach so k njemu za kuchinske blido sydnyć. Přeprosył bě sej wón tohorunja statnu ministerku za integraciju Petru Köpping (SPD) a tudyšeho měšćanostu Alexandera Ahrensa (njestronjan). Zarjadowanje přewjedźechu we wobłuku tuchwilnych Budyskich tydźenjow demokratije.

Wosebje tema ćěkancy je rozmołwu za kuchinskim blidom postajała. „Wo problemach njesměmy mjelčeć“, rjekny Ahrens. Ludźo rozprawjachu wo socialnej njerunosći. „Na tym měli dźěłać. Z wobydlerjemi Sakskeje a ćěkancami ma so jenak wobchadźeć“, wujasni Petra Köpping. Přiwšěm spytachu zastupjerjo strony AfD zarjadowanje za swoje za­měry znjewužiwać.

Vatikan (B/SN). Na swjatoprajenje maćerje Terezy spomina Vatikan z wosebitej listowej znamku. Po informacijach z Watikanskeho zarjada za filateliju a numismatiku je 95centowa znamka z wobrazom noweje swjateje ze zapisom „Swjata Tereza z Kalkutty“ na předań.

Biskop so jasnje zwuraznja

Drježdźany (B/SN). Nowy katolski Drježdźansko-Mišnjanski biskop Heinrich Timmerevers chce tež k towaršnostnym temam jasnu poziciju zabrać. „Sewjerni Němcy“ so hewak tak přez kwětku nje­zwuraznjeja, ale skerje direktnje“, rjekny Timmerevers na přijeću w Drježdźanach, na kotrež bě sej wón zastupjerjow z politiki, kultury a towaršnosće přeprosył.

Celibat reformować

Bonn (B/SN). Njedostatka katolskich měšnikow dla žada sej Centralny komitej němskich katolikow (ZdK) reformu celibata. „Mamy hižo dobrych a angažowanych diakonow – to su woženjeni mužojo“, měni prezident ZdK Thomas Sternberg. „Hdyž wjace hinak njepóńdźe, zo w dušepastyrstwje personelnje wukrawimy, a hdyž je celibat při tym zadźěwk, potom ma so wón, dokelž je mjenje wažny, złahodnić“, Sternberg potwjerdźa.

Njezwučene zasadźenje mějachu pomocnicy ADAC. Jako dyrbješe mała nopawa do Nürnbergskeje zwěrjatownje, zalěze wona do karoserije awta. Dlěje hač dwě hodźinje spytachu ju hladarjo zwěrjatownje z awta wabić. A wona wutra tam cyłe štyri dny. Hakle přiwołani pomocnicy ADAC wotšrubowachu nutř­kowne wukładźenje awta, hdźež nopawu skónčnje nańdźechu. Žona bě ju do kófroweho ruma zamknyła a do zwěrja­townje dowjezć chcyła.

Nowy rekord nošerjow narodneje drasty docpě njedźelu w Hornjej Bayerskej ležace město Beilngries. Tam je 3 414 ludźi w narodnej drasće na ludowy swjedźeń přišło. Na notarielnje kontrolo­wanym zarjadowanju zličichu jenož korektnje woblečenych nošerjow drasty. Hakle w awgusće nastajeny rekord města Kempten – 3 134 – bu tak přetrjecheny.

W Barcelonje wo boju nastupajo samostatnu Katalonsku so wobhonili

Barcelona (SN/JaW). Zjednoćenstwo dźenikow w mjeńšinowych a regionalnych rěčach Europy MIDAS, kotremuž tež Serbske Nowiny přisłušeja, chce so sylnišo w socialnych syćach prezentować. Tole­ wobzamkny jeho předsydstwo kónc tydźenja w katalanskej stolicy Barcelonje. Hač do hłowneje zhromadźizny MIDAS­ w aprylu ma sobudźěłaćer jeho sekretariata Marc Röggla naćisk za nowy wustup zhotowić. „Wažna je profesionalnosć, njejsmy amaterojo. Tak dyrbjeli z wotpowědnymi wotkazami na čłonske dźeniki skedźbnjeć a jich aktualne wozjewjenja šěrić“, rjekny čłon předsydstwa Bojan Brezigar ze słowjenskeho dźenika Primorski dnevnik w Italskej.