Berlin (dpa/K/SN). Wiceprezident Europskeho parlamenta Alexander hrabja Lambsdorff (FDP) je warnował před přechwatnym zasudźenjom Ruskeje jako zamołwiteje za wottřělenje malajziskeje Boeing 777. „By přenahle było rjec, zo je to wot Ruskeje přikazana bojowa naprawa była“, wón zwurazni. Mjezynarodni přepytowarjo su wčera rozprawjeli, lětadła wotwobaranski system typa BUK bu z Ruskeje přiwjezeny, a z pola njedaloko města Snišne raketa wottřělena. Teren bě wot proruskich mocow wobsadźeny. „Njeje wuzamknyć, zo je k mylnemu wottřělenju dóšło.“ Lambsdorff wupraji so tež přećiwo přiwótřenju sankcijow, doniž njeje jasne, štó bě přikazał raketu wottřělić.

Berlin (SN/BŠe). Łužiski kruh je wažny zaměr na swojim puću docpěło. Tak přewozmje zwjazkowe knježerstwo sobu zamołwitosć za łužiski region. Tole wobkrući zwjazkowy hospodarski minister Sigmar Gabriel (SPD) w rozmołwje z 23 komunalnymi zastupjerjemi saksko-braniborsku mjezu přesahowaceje kónčiny w Berlinje. Tak běše wón wo wobstej­nosćach a wuwićach dokładnje wobho­njeny. Nimo Gabriela wobdźělištaj so na zeńdźenju statnaj sekretaraj, za Braniborsku Hendrik Fischer ( SPD) a za Saksku dr. Hartmut Mangold (SPD), štož na wuznam rozmołwy pokazuje.

Wažne temy, kotrež wutoru wječor wobjednawachu, bě fonds za infrastrukturne projekty, kaž stej to digitalizacija a wutwar železniskeju čarow Berlin–Choćebuz a Baršć–Choćebuz. Runje tak dojednachu so na to, stejnišćo Němskeje železnicy w Choćebuzu zdźeržeć. „Łužica dóstanje financnu podpěru Zwjazka přez wšě fazy strukturneho wuwića, kaž budźe trjeba.“ Zakładnje pak su nětko najprjedy raz jasne struktury trěbne.

W debatach Sakskeho krajneho sejma njejsu Serbja přečasto tema wuradźowanjow. Hdyž tola, da so nimale bjez wu- wzaća jenički zapósłanc nam wěnuje: Hajko Kozel z frakcije Lěwicy. Wčera je wón w zwisku z namócnosćemi prawicarjow w Sakskej na to skedźbił, zo maja tež Serbja z nimi njelube nazhonjenja. Kozel naliči nadpady na serbskich młodostnych runje tak kaž wonječesćenje narodnych a nabožnych symbolow w dwurěčnej Łužicy. Při tym so toho njeboji, zo je w swojej frakciji w tym nastupanju takrjec samlutki wojowar. Tež zwonka sejma so wón za nas zasadźa. Tak wukonja dale ćišć na zamołwitych w zwisku z njewujasnjenymi namócnosćemi prawicarjow přećiwo serbskim młodostnym. Při tym jemu nazho­njenja jako prawiznik pomhaja. To mó­žemy ćim dźakowniši być. Wšako je wón w Sakskim krajnym sejmje jenički prawi­znik Serbow. Marko Wjeńka

Zhorjelc (SN/BŠe). 1 500 přistajenych Zhorjelskeho stejnišća předewzaća Bombardier je wčera před zawodom za swój přichod demonstrowało. Loni kónc lěta bě kanadiski koncern připowědźił, šmórnyć 240 dźěłowych městnow w Zhorjelskim a Budyskim zawodźe.

Slědowace jednanja z dźěłarnistwom IG metal a ze sakskim knježerstwom wunjesechu, zo móhło znajmjeńša 60 inženjerow wostać. Swobodny stat měł za to podpěru w formje inowaciskeho spěchowanja přizwolić. Hospodarski minister Martin Dulig (SPD) wšak zwurazni, zo tajku jenož płaći, jeli Bombardier dalše wobstaće stejnišćow zaruči. Koncern pak njeje so k tomu dotal wuprajił.

„Nimale lěto po připowědźenju knježi wulka njewěstosć mjez dźěłaćerjemi nastupajo přichod“, kritizuje jednaćel wuchodosakskeje IG metal Jan Otto a žada sej skónčnje jasnosć. Koncern měł swoje nadawki přichodnych lět wozjewić, zo bychu přistajeni w zawodomaj woměrje dźěłać móhli.“ Wupowědźenja zawodnych přičin dla njejsu zastupujomne.