Po lětomaj koalicije
Budyšin (CK/SN). Za bój přećiwo dołhodobnej bjezdźěłnosći chce Swobodny stat Sakska wosebity program we wobjimje 13 milionow eurow nastorčić. Takle steji to znajmjeńša w naćisku knježerstwa za přichodny hospodarski plan. Při rozrosće hospodarstwa wo 1,5 procentow w Sakskej je bjezdźěłnosć tuchwilu tak mała kaž hišće ženje po politiskim přewróće. Najebać to je 68 000 ludźi hižo dołhi čas bjez dźěła. „Někotrych z nich njebudźemy ženje do dźěłoweho poměra posrědkować móc“, rjekny sakski statny sekretar Stefan Brangs (SPD) wčera na forumje ze zawodnymi a personalnymi radami z Drježdźan a wuchodneje Sakskeje w Budyskim hotelu Best Western. 3 000 bjezdźěłnym pak chce knježerstwo dźěło zmóžnić.
To a tamne (08.09.16)
Dokelž hrožeše konopej z woknom padnyć, su starosćiwi wobydlerjo Běłowodźanskeho domu policiju wołali. Skónčnje so wukopa, zo chcyše 36lětny wotnajer bydlenja ze swojimi přećelemi konopej přez wokno dele pušćić. Tón pak bě trochu přešěroki, zo njedóstachu jón ani tam ani sem. Pomocnicy běchu muža z problemom samoho wostajili. Hakle wohnjowej woborje so poradźi, konopej wróćo do bydlenja bugsěrować.
Nimale milion eurow by čěski žurnalist płaćić dyrbjał, chcył-li naprašowanje ke kriminalnej statistice wotmołwjene měć. Policija zdźěli, zo měła za trěbne informacije 1 543 485 njeskutkow přeńć, štož woznamjenja 1 543 485 x 4 = 6 173 940 minutow, to rěka 102 899 hodźin. Přeličene na mzdu by to 956 100 eurow było. Wón měł zličbowanku w běhu 60 dnjow zapłaćić abo naprašowanje cofnyć.
Nochcedźa ničo změnić
Mnichow (dpa/SN). W rozkorje wo namrěwstwowy dawk wostanje zwjazkowa CSU kruta a žada sej wot SPD podwolenje. Do jutřišich wuradźowanjow posrědkowanskeho wuběrka zwjazkoweho sejma a Zwjazkoweje rady zwurazni bayerski financny minister Markus Söder (CSU), zo nochcedźa w Mnichowje žane zwyšenje dawka. SPD a krajni šefojo-Zeleni pak prócuja so wo změnu zakonja.
Tež Bosch pod ćišćom
Hamburg (dpa/SN). Nastupajo wotpłunowy skandal jězdźidłoweho koncerna Volkswagen dóstawa so tež dodawaćel Bosch pod ćišć. Kaž rešerše rozhłosoweju sćelakow NDR, WDR a nowiny Süddeutsche Zeitung wujewjeja, bě Bosch masiwnje do wotpłunoweje afery splećeny. Tak su jeho inženjerojo na wobšudniskej software sobu dźěłali. Dodawarjej měło jasne być, zo je to zakazane. Medije poćahuja swoje informacije z dotal njespóznajomnych čornych wotrězkow wobskóržby USA, kotrež su nětko přistupne.
Na agrarnej konferency
Womłodźeja wuwozny móst
Po ponowjenju móža z nim dalše 40 lět we wuhlowej jamje dźěłać
Wochozy (dpa/SN/JaW). Energijowy koncern Vattenfall je dźensa nowe machace pjerowanje (Große Schwinge) na wuwoznym mosće F 60 we Wochožanskej brunicowej jamje montować započał. Hakle wčera su 315 tonow ćežki kolos přiwjezli, a wulkej kranaj stej jón skónčnje na jeho poprawne městno stajiłoj. Hromadu stwarili běchu hoberski mašinowy dźěl dwaj kilometraj wot F 60 zdalene. Z modulom za ćežkotransporty dowjezechu jón hač do jamy, za čož trjebachu nimale połdra hodźiny, wšako při spěšnosći šěsć kilometrow na hodźinu jenož pomału doprědka dźe. Přiwšěm su sobudźěłaćerjo specialneho wozydłownistwa tak spěšnje jěli kaž bě jim móžno, rjekny šofer René Wermke.
Serbske mjena
Berlin (SN/JaW). Wot wčerawšeho wuradźuje w Berlinje Němska mjeńšinowa rada. Gremij, wobstejacy ze zastupjerjow Danow, Frizow, Sintow a Romow kaž tež Serbow, wěnowaše so wčera anticyganizmej, diskriminaciji a róli politikarjow w boju přećiwo rasizmej, namocy a hidźe napřećo zhromadźenstwam Sintow a Romow. Zaměr bě, so z přiběracym rasizmom rozestajeć a zhromadne dźěło nawodnych politikarjow zesylnić, zo bychu diskriminaciji zadźěwali. „Rasizm, předsudki a namóc přećiwo Sintam a Romam su stajnje hišće hłuboko w towaršnosći zakótwjene. Dyrbimy přećiwo tejle stigmatizaciji a wumjezowanju najwjetšeje narodneje mjeńšiny Europy wojować: Městno Sintow a Romow je wosrjedź našeje towaršnosće, nic na jeje kromje“, rjekny europski statny minister Michael Roth na wotewrjenju zarjadowanja.
Generalna debata
Dźěći na ćěkańcy
Signal Turkowskeje?
To a tamne (07.09.16)
Chětro nastróžił je so muž z Italskeje, jako dósta milinowu zličbowanku za 65 500 eurow. Daniele Cametti Aspri z Roma pak je stajnje swoje zličbowanki płaćił, kaž rjekny. Energijowe předewzaće Acea wšak jemu zdźěli, zo jedna so wo nachwatane płaćenja minjenych dźesać lět, a tuž na žadanju wobstawa. Zadwělowany je Italčan mjeztym na swojej Facebook-stronje k tak mjenowanemu crowdfundingej namołwjał, zo by pjenjezy za mega-zličbowanku někak hromadu dóstał.
Štyri kófry połne žiwych reptilijow su cłownicy na Amsterdamskim lětanišću našli. 259 hadow, ješćelcow a nopawow su tam sćazali. Dźesać zwěrjatow bě mjeztym hižo zahinyło. Třo Španičenjo chcychu reptilije, mjez nimi žadne leguany, z Mexika do Španiskeje pašować. Hódnota reptilijow je 80 000 eurow.
Nadpad wotwobarali
Kabul (dpa/SN). Afghaniske wěstotne mocy su nadpad na pomocnu organizaciju Care w Kabulu po jědnaće hodźinach skónčnje wotwobarali. Kaž rěčnik nutřkowneho ministerstwa Sedik Sedikki wozjewi, buchu wšitcy třo atentatnicy morjeni. Nimo toho zahiny ciwilist, šěsć wosobow so zrani. 42 ludźi, mjez nimi dźesać wukrajnikow, bu wuchowanych. Care dźěła wot lěta 1961 w Afghanistanje, hdźež stara so wosebje wo kubłanje.
Šefojo Asean so schadźuja
Vientiane (dpa/SN). Wot dźensnišeho wuradźuja statni šefojo juhoaziskich krajow (Asean). Tež rozmołwy z prezidentom USA Barackom Obamu a dalšimi zastupjerjemi z Chiny a Ruskeje su předwidźane. Hłowne temy su teritorialna rozkora w Juhochinskim morju, demokratija a čłowjeske prawa, rozestajenja mjez Chinu a USA kaž tež wohroženja islamskich ekstremistow dla. Wěstotni fachowcy boja so přiběraceho radikalizowanja muslimow.
Wjac pjenjez za İncirlik
