Izmir (B/SN). Křesćenjo Turkowskeje witaja kónc wojerskeho puča. To wobkrući tež předsyda ewangelskeho zwjazka baptistow Ertan Çevik w Izmiru. „By-li wo­jerstwo móc přewzało, by Turkowska w swojim wuwiću znajmjeńša wo dźesać lět wróćo padnyła“, rjekny Çevik. Zwjazkej baptistow w Turkowskej přisłuša pjeć wosadow z 300 sobustawami. Terorowych nadpadow dla steja woni pod škitom policije. 95 procentow z 75 milionow wobydlerjow su muslimojo. Křesćanow je něhdźe 120 000.

Móža cyrkej zaso wužiwać

Damaskus (B/SN). Zničena cyrkej w damaskusu je zwuporjedźana. Kaž Gustava Adolfowy skutk (skutk diaspory EKD) zdźěli, steji cyrkej reformowaneje wosady w křesćanskim dźělu města. Tuta kónčina­ bu loni jara atakowana. Rakety běchu škodu načinili na třěše a w Božim domje. Gustava Adolfowy skutk je 10 000 eurow za wobnowjenje přewostajił. Wosadny farar Boutros Zaour dźakowaše so za podpěru, prajo: „Tak mamy wobnowjenu, krasnu cyrkej, w kotrejž móžemy našeho Knjeza a Wumóžnika chwalić a sławić – při wšěch ćežkich lětach, kotrež tu přežiwjamy.“

Dotal žanu bilancu njepodali

Nimale 13 hodźin na 30 metrow wysokim štomje wutrać dyrbješe pilot znje­zboženeho ultralochkeho lětadła njedaloko Schwäbisch Gmünda, doniž jeho wohnjowa wobora njewuchowa. Muž bě wčera wokoło 20 hodź. znjezbožił a so we wjeršku štoma zapopadnył. Pomocnicy dyrbjachu lětadło najprjedy stabilizować, štož bě při nahłej skłoninje dosć naročne. Hakle dźensa rano móžachu znjezboženeho wuswobodźić. Byrnjež wonkownje njezranjeny był, dowjezechu jeho do chorownje. Lětadło su w běhu dnja ze štoma wzali. Přičina njezboža njeje znata.

30 centimetrow dołhu twjerdu kołbasu je 49lětny w Neubrandenburgu do awta 47lětneho ćisnył, po tym zo běštaj so zaparkowanja dla zwadźiłoj a sej wudma nadawałoj. Při tym so zadnje durje awta wobškodźichu. Policija nětko wosobinskeho ranjenja, hroženja a wobškodźenja wěcow dla přećiwo woběmaj přepytuje.

Berlin (dpa/SN). Z wjacorymi zarjadowanjemi su zawčerawšim, sobotu, wopory Berlinskeje murje wopominali, kotruž běchu před 55 lětami, 13. awgusta 1961, twarić započeli. Na centralnym wopomnišću na Bernauskej dróze je knježacy měšćanosta Berlina Michael Müller (SPD) wěnc połožił. Něhdźe sto hosći, mjez nimi 50 swědkow časa, bě přitomnych. Do toho bě so Müller na wopominanskim zarjadowanju w Kapałce wujednanja w ně­hdyšim smjertnym pasmje wobdźělił.

Rozestajenja z policiju

Milwaukee. W měsće Milwaukee w zwjazkowym staće USA Wisconsin je wčera k rozestajenjam mjez roznjem­drjenymi demonstrantami a policiju dóšło. Nastork bě smjerć muža při policajskej kontroli. W běhu wječora so połoženje přiwótři, jako demonstranća awta, wobchody a tankownju zapalichu. Tež wutřěle běchu słyšeć, rozprawja powěsćernja dpa. Po informacijach policije bě 23lětny wobrónjeny muž před policiju ćěkał, na čož jeho zastojnik zatřěli.

System bankow wohroženy

Kassel (dpa/K/SN). Rozkocorowana AfD wurjadny stronski zjězd za nowowólby zwjazkoweho předsydstwa njezwoła. Tole je stronski konwent wčera w Kasselu z wjetšinu wobzamknył, kaž rjekny předsyda konwenta Berenga Elsner. Jědnaće hodźin bě gremij za zawrjenymi durjemi wo přewinjenju zwady směra strony dla wuradźował, kotraž traje mjez kopředsydku AfD Frauke Petry a předsydu Jörgom Meuthenom. Konflikt bě eskalěrował, po tym zo bě Meuthen šćěpjenje badensko-württembergskeje frakcije AfD pohonił. By-li k wurjadnemu stronskemu zjězdej dóšło, by to situaciju AfD před přichodnymi wólbami zwjazkoweho sejma přiwótřiło a jej chětro zeškodźalo.