Wšojedne, hač słušeš k fanam Angele Merkel abo nic: Štož sej wona tele dny nabrěmjenja­, wužaduja sej respekt runje tak kaž sobuželnosć. Derje wědźo, kak we Waršawje,­ w Praze, Bratislavje a Budapesće wo jeje politice ćěkancam napřećo mysla, je so wona na puć k zamołwitym politikarjam tychle krajow nastajiła. Hižo zwoprědka bě jasne, zo planuja jeje přećiwnicy w Praze hnydom štyri demonstracije. A što drje móžeše wot čěskeho statneho prezidenta wočakować, kiž je wčera jeje azylowu politiku „njezmysł“ mjenował? Hišće hórje je so jej bjezdwěla dźensa we Waršawje zešło, hdźež zetka zastupnikow­ Visegrádskeje skupiny, kotřiž raznje wotpokazuja ćěkancow po woli EU přiwzać. Njewěrju, zo je zwjazkowa kanclerka tak naiwna, zo nastajenje tychle po­litikarjow ze swojim wopytom změni. Ćim zmužićišo je, zo so přiwšěm do woneje „hadźaceje jamy“ poda. Marko Wjeńka

Chětro agresiwny kenguru je w Awstralskej před domom hrajkacu holčku ata­kował. Na to da so mać do boja z chětro sylnym zwě­rjećom, kotrež bě runje tak wulke kaž wona sama. Hakle z pomocu susoda móžeše­ žona kenguruwa wućěrić. Tón pochadźeše z bliskeje farmy, hdźež tele zwě­rjata plahuja. Pječa maja tam mjeztym 93 eksemplarow na poměrnje małej ležownosći. To drje je tak agresiwne čini.

Kołp je dźensa rano krótki čas Berlinski wobchad spěšnoželeznicy na wjacorych čarach lemił. Ptak bě so na dwórnišćo Bellevue we wobwodźe Tiergarten zabłudźił. Přiwołani policisća kołpja njezra­njeneho popadnychu, jako po kolijach běhaše. Krótko na to bě zaso na swobodźe. Za čas njewšědneje akcije dyrbjachu železniski wobchad něhdźe dwaceći mjeńšin přetorhnyć.

Moskwa (dpa/SN). Po wukazu prezidenta Wladimira Putina je ruske wójsko njepřizjewjene pruwowanje swojeje zasadźenskeje hotowosće zahajiło. Na wulkomanewru wobdźěleja so jednotki južneho, zapadneho a centralneho zakitowan­- ske­ho wobwoda kaž tež sewjeromórskeje floty, zdźěli zakitowanski minister Sergej Šojgu dźensa w Moskwje. Hladajo na nowe wohroženja za Rusku chcedźa předewšěm zasadźenje w krizowych situacijach zwučować, minister připowědźi.

Měrowe zrěčenje dojednane

Havanna (dpa/SN). Po nimale štyri lěta trajacych jednanjach stej so kolumbiske knježerstwo a lěwicarska zběžkarska organizacija FARC na měrowe zrěčenje dojednałoj. Tole zdźělichu wčera wječor w kubaskej stolicy Havannje. Zrěčenje chce­dźa w septembru podpisać. W oktobru dyrbja Kolumbičenjo w ludowym wothłosowanju wo tym rozsudźić. Tak so najstarši konflikt we Łaćonskej Americe skónči, kiž je sej wot 1960tych lět wjace hač 220 000 smjertnych woporow žadał.

Nalada w firmach hubjeńša

Dotal je 247 mortwych a móhło jich hišće wjac być

Rom/Berlin (dpa/K/SN). Zemjerženje w nocy na srjedu w srjedźnej Italskej ma nětko tola rozměry tragedije. W nocy je ličba smjertnych woporow dale rozrostła. Ciwilny škit rěči wo 247 mortwych. Ma wšak so za to, zo je woporow hišće wjele wjac. „W Amatrice mamy tuchwilu hižo 200 ćěłow“, rjekny měšćanosta. Městačko bě wosebje potrjechene.

Tele zemjerženje je mjeztym runje tak zahubne, chiba hišće hrózbniše hač wone w aprylu 2004, kotrež bě L‘Aquilu zapusćiło. Tehdy zahiny 200 ludźi. Spočatnje so nadźijachu, zo nětčiše zemjerženje samsny wuskutk njenabudźe. Ministerski prezident Matteo Renzi bě wšak při swojim wopyće hižo spomnił, zo budźe najskerje jara wjele mortwych.