Jako dźensa čitach, zo ma knježerstwo Schleswigsko-Holsteinskeje mjeńšinowe rěče – potajkim frizišćinu, danšćinu a delnjoněmčinu – w statnym zrěčenju z telewizijnym a rozhłosowym sćelakom NDR zakótwić, so zwjeselich. Nic jenož fakta dla, ale tež, dokelž běchu Serbja w tym přikład. Tele pozitiwne wuwiće tež pokazuje, kak samozrozumliwe nam Serbam je, zo słyšimy wšědnje rano tři a připoł­dnju hodźinu wusyłanja na rozhłosowymaj sćelakomaj MDR a RBB w swojej maćeršćinje. Samozrozumliwe mjeztym tež je, zo mamy měsačnje na mjenowanymaj sćelakomaj w telewiziji poł hodźiny hornjo- a poł hodźiny delnjoserbskeho wusyłanja. Tak derje kaž my Serbja sej někotražkuli mjeńšina w Němskej nima. Tak słuša zamołwitym za tele postupowanje w Sakskej a Braniborskej kaž tež wšěm sobudźěłaćerjam­ wusyłanjow naš dźak! Janek Wowčer

Zhorjelc (dpa/K/SN). Dobrych 1 000 dźěławych Zhorjelskeho Bombardiera dyrbi dalši tydźeń na wotmołwu za přichodom čakać. Po poł hodźinje su zawodnu zhromadźiznu wčera přetorhnyli a na přichodny štwórtk přesunyli. Šef koncerna za Němsku Germar Wacker, kiž chcyše so poprawom wobdźělić, dyrbješe druhich terminow dla wotprajić, kaž to zastupnik dźěłarnistwa wusprawni. Wuslědk tuž njespokoja. „Atmosfera bě napjata, nimale agresiwna. Je dosć wěcow, wo kotrychž dyrbimy rěčeć. Němske šefowstwo dyrbi skónčnje rjec, što je fakt“, měnjachu rozhorjeni dźěławi. Před lětom bě kanadiski producent wagonow připowědźił, zo w zawodomaj w Zhorjelcu a Budyšinje wotmysli městna masiwnje wot­twarjeć. Dotal je jeju přichod njewěsty.

Moskwa (dpa/SN). Ruska je na swojim zepěranišću Tartus w Syriskej moderny raketywotwobaranski system S-300 nastajiła. „Kompleks ma zepěranišćo wójnskeje mariny kaž tež łódźe před pobrjohom škitać“, rjekny generalny major Igor Konašenkow w Moskwje. System nikoho njewohroža, dokelž je ryzy zakitowanski. Nimo toho je Ruska hižo lětadławotwobaranske rakety S-400 nastajiła, Konašenkow w tym zwisku praji.

Najebać přetorhnjene měrowe jednanja z USA chce so Ruska w Syriskej dale angažować, kaž rěčnik Krjemla Dmitrij Pjeskow potwjerdźi. „Kónc rozmołwow połoženje wězo chětro poćežuje. To pak njerěka, zo syriske wójsko wjace njepodpěrujemy“, Pjeskow po informacijach powěsćernje Tass rjekny. Ruske knježerstwo kónc bilateralnych rozmołwow wo přiměrje w Syriskej wuraznje wobžaruje. Přiwšěm njeje połoženje dramatiske. Mjez zastupnikami wójskow wobeju krajow kontakty dale wobsteja, zo njeby při wojerskich akcijach w Syriskej ke konfliktam mjez USA a Ruskej dóšło.

Nowoseelandski rugbyjowy profi Aaron Smith je sej sam hrajnu přestawku nanuzował. Wón bu suspendowany, dokelž bě so na lětanišću w nowoseelandskim Christchurchu njediskretnje ze žonu zabawjał, a to na nuzniku za zbrašenych. Naležnosć njeby za profija sćěwki měła, njeby-li swójbny nan, kiž bě ze sydom dźěćimi w bliskosći, wšitko wobkedźbował a so pisomnje hóršił.

Na Erfurtskim hłownym dwórnišću je mać swojej dźěsći scomt kóframi prosće zabyła. Sobudźěłaćerce železnicy stej třilětna holčka a pjećlětny hólc wutoru wječor­ we wosmich napadnyłoj, dokelž běštej cyle samaj z wačokami na nastupišću. Krótko do toho bě tam ćah do směra na Lipsk wotjěł. W nim mać dźěsći se­dźeše. Wona so wězo hnydom zaso do Erfurta wróći, zo by holčku, hólca a kófry wotewzała.