EU móhła Israelej hrozyć
Brüssel (dpa/SN). Europska unija natwarja kulisu hroženja přećiwo Israelej, dyrbjeli nowe dojednanja za pomoc w Gazaskim pasmje zwrěšćić. Diplomaća w Brüsselu wobkrućichu němskej powěsćerni dpa, zo je za wonkowne naležnosće zamołwita społnomócnjena EU Kaja Kallas sobustawskim statam lisćinu naprawow sposrědkowała, z kotrymiž hodźał so ćišć na Israel wukonjeć. Tuta lisćina wopřija na přikład hospodarske lěpšiny, kotrež bychu Israelej šmórnyli.
Němska zapłaći systemaj
Rom (dpa/SN). Po wuprajenjach ukrainskeho prezidenta Wolodymyra Zelenskeho je so Němska zwólniwa wuprajiła, knježerstwu w Kijewje nakup dweju systemow typa Patriot za wotwobaranje nadpadow z powětra financować. „Němska je zwólniwa – mamy dojednanje –, dwaj systemaj zapłaćić“, praji wón na nowinarskej konferency w italskej stolicy. Tam wotměwa so tuchwilu konferenca wo nowonatwarje Ukrainy.
Mjenje ludźi přenocowało
11. julija před 30 lětami je so masaker w Srebrenicy wotměł. ...
Policija ma parady škitać
Žadaja sej kónc taktěrowanja
Drježdźany (dpa/SN). Zeleni w Sakskim krajnym sejmje wočakuja wot knježerstwa jasne stejišćo nastupajo nowe statne zrěčenje rozhłosa. „Žadam sej wot statneho knježerstwa jasne wuprajenje wo tym, hač wone statne zrěčenje zwrěšćić da, prjed hač smy wo nim scyła w krajnym sejmje diskutowali“, rozłoži ekspertka za medije Claudia Maicher. Čas za diskusiju so pomału nachila a swobodny stat dawa zjawnosć po wšej Němskej, ale tež parlamenty tamnych krajow dale póćmje brodźić, twjerdźi Maicher.
Dale Maicher ministerskemu prezidentej Michaelej Kretschmerej (CDU) wumjetuje, zo nochce wón statne zrěčenje podpisać, kotrež su zwjazkowe kraje zhromadnje wudźěłali. Zo by so tute „taktěrowanje“ nětko skónčiło, je so Maicher z małym naprašowanjom na statne knježerstwo wobroćiła. Wona chce wědźeć, čehodla so Kretschmer ze swojim rozsudom tak dliji.
Mnozy wojować nochcedźa
Zwjazkowa rada da zelenu swěcu
Berlin (dpa/SN). Po zwjazkowym sejmje je dźensa tež zwjazkowa rada dawkowym wotćeženjam za zawody přihłosowała. Přidatne móžnosće wotsadźenja maja firmam zmóžnić wjace inwestować. Hdyž je tutón booster w lěće 2028 wuběžał, ma korporaciski dawk wot tuchwilu 15 procentow na 10 procentow w lěće 2032 spadować. Zwjazk, kraje a komuny maja noweho rjadowanja dla něhdźe 48 miliardow eurow mjenje dawkow wočakować. Kraje sej tohodla wurunanje, wosebje za zdźěla wysoko zadołžene komuny žadaja. Zwjazk přewza dawki gmejnow kompletnje – hač do lěta 2029. Dokelž njesmě zwjazk krajam jednorje pjenjezy přepokazać, dóstanu kraje wjac pjenjez přez dochody nadhódnotneho dawka.
Zwjazkowy kancler Friedrich Merz (CDU) praji w zwjazkowej radźe, zo dyrbi so knježerstwo nuznje wo rozrost hospodarstwa starać. Z toho wšě statne runiny financielnje profituja. Ministerski prezident Badensko-Württembergskeje Winfried Kretschmann (Zeleni) praji, zo je nětko prawy čas za paket inwesticijow, kaž jón schwalichu.
Krućiše regule za zastojnikow
Sobustawojo AfD a druhich ekstremistiskich organizacijow potrjecheni
Mainz (dpa/SN). Sobustawam AfD chcedźa w Porynsko-Pfalcowskej w přichodźe dźěło w zjawnej słužbje zakazać. Nutřkowny minister Michael Ebling (SPD) je tohodla připowědźił, zo chcedźa modality přistajenja do statneje słužby přiwótřić. „Swěra wustawje njeje přeće, njeje doporučenje, njeje wuznaće hubow, wona je prěnja winowatosć kóždeho zastojnika w našim kraju“, minister podšmórny. „Štóž so do słužby stata staja, dyrbi kóždy čas loyalnje k wustawje stać, bjez diskusije.“
Konkretnje chcedźa kandidatow w přichodźe při přistajenju pisomnje wo swěrje k wustawje powučić. Wšitcy zajimcy za zastojnistwo dyrbjeli wuznać, zo ekstremistiskej organizaciji njepřisłušeja a tež w zašłych pjeć lětach w tajkej aktiwni byli njejsu.
To a tamne (11.07.25)
Agresiwny byk pućowarjow w Šwicarskej mjerza. Narodna warnowanska słužba Alertswiss je přez swoju app ludźi před swobodnje so hibacym skoćećom w pućowanskim regionje Montalchez-Les Prises w kantonje Neuenburg warnowała. Na žadyn pad njeměli so ludźo něhdźe 600 kg ćežkemu bykej bližić. Štóž jeho wuhlada, měł na blaku nuzowu słužbu pod čisłom 117 zwonić. Policija so wo pad stara.
Dlěje hač dźesać dnjow młodu Němku hižo pytaja, kotraž mjeztym dwě lěće po Awstralskej pućuje. Nětko drje su policisća jeje awto nadešli, ale nichtó njewě, dokal je so žona zhubiła. Na awće samym běchu policisća mechaniske brachi zwěsćili. Wo tym rozprawja nowina The West Australian. Zo bychu žonu z mjenom Wilga prawje bórze namakali, su mjeztym přidatnych zastojnikow zasadźili.
Debata wo lětanišću pači
Přichod Drježdźanskeho stejnišća bóle hač hdy hewak wohroženy
Lipsk/Halle/Drježdźany (dpa/SN). W Sakskej, Saksko-Anhaltskej a Durinskej su prózdniny – lětadła do dowola su nětko wosebje požadane. Kaž Srjedźoněmska lětanišćowa AG (MFAG) zdźěli, wočakowachu w prěnich tydźenjach prózdnin w Lipsku/Halle a Drježdźanach něhdźe 24 500 pasažěrow. Mjeztym pak zo je jich w Lipsku/Halle jara wjele, su hale w Drježdźanach skerje prózdne. Centralne prašenje tuž je, hač so lětanišćo w sakskej stolicy docyła hišće zadani.
Wobkedźbowarjo branše rysuja jasny wobraz: „Drježdźany a Erfurt njejstej za turistow dawno tak zajimawej kaž Lipsk“, praji Timmo Gause, nawoda wotrjada za transport poskićowarja pućowanjow Dertour. Mnozy pućowacy z mjenowanych třoch zwjazkowych krajow na wuchodźe wotleća šěršeho poskitka dla radšo wot wjetšich lětanišćow kaž Lipsk/Halle, Frankobrod abo Mnichow.
Tež Pólska swoje mjezy ilegalnych migrantow dla kontroluje
Dypkownje wopołnocy, w nocy na póndźelu, 7. julija 2025, su wotrjad za škit mjezy Wódra, policija kaž tež policija wójska kontrolne stacije na pólskim boku mjezy wobsadźili. Z tutej naprawu chcedźa ilegalnemu zapućowanju migrantow do Pólskeje zadźěwać. Smy zastojnikow při pólsko-němskej mjezy w Zgorzelecu přewodźeli.
„Wažne nam předewšěm je, zo wobchad z tutymi naprawami njetrjebawšo njehaćimy“, zastojnicy powědaja. Wosebje dokładnje kontroluja małe transportery, busy kaž tež jězdźidła ze sčornjenymi woknami. Štóž chce sej do Pólskeje dojěć, měł z kontrolemi wupokaza ličić, druhdy samo z tym, zo zastojnicy rum za wačoki přepytuja. Při pólsko-němskej hranicy su tute kontrole spěšnje wotběželi a njejsu wobchad haćili abo dalše wobmjezowanja zawinowali.
