Hodźij (mm/SN). Po žiwej diskusiji zakónči so předwčerawšu sobotu hłowna zhromadźizna Serbskeho wosadneho zwjazka (SWZ) na Hodźijskim kantoraće. Na njej zastupowaše šěsnaće přitomnych dwurěčne ewangelske wosady cyrkwinskeho wobwoda Budyšin-Kamjenc. Na spočatku poda předsyda SWZ, serbski superintendent Krystof Rummel, přehlad wo serbskich a dwurěčnych kemšach lěta 2022 a wo dalšich wosadnych a nadregionalnych aktiwitach. Wosebite wjerški běchu Serbski ewangelski kónc tydźenja w Hainewaldźe, serbski cyrkwinski dźeń w Bukecach, dworowy swjedźeń w Hrubjelčicach a wudaće nowych spěwarskich za dźěći a młodźinu z titlom „Zernička“. Wuzběhnyć maja so tež prawidłowne zetkanja Bjesadow w Bukecach, Rakecach a Hodźiju. Wšitke zwučene zarjadowanja so lětsa dale powjedu. Serbski superintendent n. w. Jan Malink rozprawješe wo dźěle na nowej kemšacej knize, kotraž lětsa nazymu wuńdźe. Friedhart Krawc ze Słóncy předstaji projekt, kotryž jemu wosebje na wutrobje leži, móžne wudaće serbskeje biblije. Mato Krygaŕ z Wuježka rozmysluje wo hudźbnym projekće z dźěćimi.