Dźeń žonow a Equal Pay Day přičinje wojowanja wo samsne prawa

Budyšin/Drježdźany (SN/MkWj). Žony steja tele dny w srjedźišću zjawneje kedźbnosće. Hladajo na jutřiši mjezynarodne dźeń žonow sej Lěwica a SPD žadatej, zo měła sej towaršnosć dźěło žonow bóle wažić. Tole chcedźa jutře na demonstracijach zwuraznić a sej lěpše runostajenje, lěpše dźěłowe wuměnjenja, dobre mzdy a renty kaž tež fairniše rozdźělenje hladanskich dźěłow žadać, rjekny městopředsydka dźěłarnistwa DGB Sakskeje Daniela Kolbe wčera w Drježdźanach.

W srjedźišću jutřišich warnowanskich stawkow w zjawnej słužbje steji akcija „Dźeń žonow za wšěch – 8. měrc jako swjatk“. Tutón dźeń w Sakskej na swjatk přeměnić, by wažny signal za wšu towaršnosć a hódnoćenje na dobro runo­stajenja žonow był, Kolbe potwjerdźi.