Naćisk prawo Serbowkow na splahej přiměrjenu formu mjena zaruča

Berlin/Budyšin (SN/at). Reforma mjenoweho prawa w Němskej je wažny krok dale: Po tym zo bě zwjazkowy minister justicy Marco Buschmann (FDP) kónc měrca wobsahowe ćežišća wozjewił, je wón předwčerawšim naćisk „Zakonja wo změnje prawow ródneho mjena a mjena w mandźelstwje“ zjawnosći předstajił.

Serbja a Frizojo su z wosebitym zajimom na naćisk čakali, wšako měri so z cyłkownje pjeć nowosćow zakonja jedna, splahej přiměrjene swójbne mjena, wosebje na nich. Studowanje dokumenta pak wujewi, zo njeje połoženje rozsudnje hinaše hač po podijowej diskusiji składnostnje finisaže pućowanskeje wustajeńcy „Was heißt hier Minderheit?“ loni 4. apryla w zwjazkowym sejmje w Berlinje.