Přičina wohenja w Großröhrsdorfskej cyrkwi žadyn techniski defekt njebě
Wulke Rědorjecy/Großröhrsdorf (dpa/SN). Přičina wohenja w Großröhsdorfskej ewangelskej cyrkwi bě po informacijach policije zapalerstwo. Mjeztym bu 40lětny jako podhladny zajaty, policija zawčerawšim zdźěli. Muž je njeskutk mjeztym přiznał. Woheń bě baroknu cyrkej w nocy na 4. awgust zničił. Wčera je něhdźe 150 ludźi open-air Božu słužbu na farskim dworje wosady swjećiło. To běchu prěnje kemše po wohenju. Farar Stefan Schwarzenberg dźakowaše so wšitkim zasadźenskim mocam wohnjoweje wobory a techniskeho pomocneho skutka kaž tež wosadnym. Powěsć, zo jedna so wo zapalerstwo a zo bu podhladny zajaty, dyrbja wosadni najprjedy předźěłać. Wjele ludźi je z toho wuchadźało, zo bě přičina wohenja techniski defekt.
