Olympiske hry 2024 w Parisu su so wčera, ze swjatočnosću, nimale runje tak jimace zakónčili, kaž su startowali. Při tym staj olympiskaj dobyćerjej triatletka Laura Lindemann a kanuta Max Rendschmidt němsku chorhoj do Stade de France njesłoj.

Němski team zakónči olympiske hry w Parisu mjez najlěpšimi dźesać narodami hladajo na zdobyte medalje, je pak so porno hram w Tokiju znowa pohubjeńšił. Z 12 złotymi medaljemi, 13 slěbornymi kaž tež 8 bronzowymi docpě team Němskeho olympiskeho zwjazka (DOSB) dźesate městno.

Kulostorkarka Yemisi Ogunleye z Mannheima je sensacionelnje olympiske złoto dobyła. 25lětna docpě w poslednim pospyće dalokosć wot 20,00 metrow. Z tym postara so wona wo prěnje a jeničke złoto němskeho lochkoatletiskeho zwjazka při lětušich hrach.

Do toho docpěchu hižo němske sprinterki w stafli přez 4x100 metrow, ze sylnym běhom bronzu. To bě wulka njewočakowana překwapjenka.