Budyšin (SN/lym). Hižo pjaty raz je Serbski institut (SI) zašłej pjatk a sobotu zetkanje sorabistiskeho dorosta w Budyšinje přewjedł. Zarjadowanje organizuja stajnje kóžde druhe lěto, při tym stejitej nawjazanje nowych kontaktow a interdisciplinarna wuměna w srjedźišću. Cyłkownje 13 přednošowarjow z Němskeje, Pólskeje a samo Chile předstaji lětsa wudźěłki masterowych, doktorskich abo studentskich dźěłow. Nimo toho móžachu wobdźělnicy sobudźěłaćerjow SI zeznać a so z nimi wo jich wědomostnym wuwiću rozmołwjeć.
Tónraz planowachu zetkanje štyrjo wot cyłkownje sydom na SI promowowacych dorostowych wědomostnikow. Młode mustwo chce zarjadowanje z mjenom sad (sorabistiski akademiski dorost) etablěrować. Po witanju předstaji wědomostnica SI dr. Lubina Malinkowa stawizny kaž tež dźěławosć Serbskeho instituta. Sćěhowaše mjezsobne zeznaće přitomnych z pomocu hrow wonka na zahrodźe instituta.
