Što nowe prawo mjena za serbsku towaršnosć woznamjenja

Berlin/Budyšin (lmc/SN). Wot 1. meje 2025 płaći nowe prawo mjena. Za serbski lud je to ćichi, ale wuznamny krok. Prěni raz dowoli zakoń wuraznje, zo smědźa přisłušnicy narodnych mjeńšin swoje swójbne mjeno we wupokazu rěčnym prawidłam swojeje towaršnosće přiměrić. Nowy zakoń serbske mjenowe formy kaž „Nowakowa“ abo „Šołćina“ tež hamtsce zmóžnja.

Wosebje za serbske žony woznamjenja nowe prawo mjena oficialne připóznaće toho, štož je w serbskej rěči dawno hižo žiwa realita: Mjena sćěhuja tu – kaž we wjele druhich słowjanskich rěčach – gramatiskim prawidłam, kotrež splah špiheluja. Kóncowki kaž -owa njepředstajeja při tym wobsydstwo abo wotwisnosć, ale rěčnu preciznosć a kulturnu identitu. Wone pokazuja, štož bě dotal husto njewidźomne: serbsku rěč jako dźěl swójskeje identity.