6. namołwa za požadanje wo spěchowanske srědki z EU-programa LEADER kónči so 7. awgusta. Milan Pawlik je so z LEADER-poradźowarku w Rakečanskim běrowje Towarstwa za spěchowanje Hornjołužiskeje hole a haty (OHTL) Katrin Kubašowej rozmołwjał.
Kelko ludźi je so w aktualnej dobje powabiło?
K. Kubašowa: Dotal mamy jenož třoch. Po našich nazhonjenjach pak woteda wjele požadarjow swoje projektne podłožki w poslednich dnjach do kónca požadanskeje doby. Zajimcy njech so rady hišće pola nas přizjewja!
Štó smě so wo spěchowanje požadać?
K. Kubašowa: Zasadnje smě so kóždy z projektom požadać, kotryž směrnicam LEADER-programa kaž tež našemu regionalnemu wuwićowemu planej wotpowěduje. To móže być priwatna wosoba, předewzaće, projektne zjednoćenstwo abo lokalna akciska skupina kaž tež komuna.
Što je maksimalna spěchowanska suma, kotruž móže požadar wočakować?
K. Kubašowa: To je we wšelakorych spěchowanskich wobłukach jara rozdźělne. Cyłkownje pak sahaja spěchowanske sumy wot 20 000 hač do 200 000 eurow. 10 procentow projektnych kóštow dyrbi požadar sam zwjesć.
