Łaz (lmc/SN). Na jěchanskim turněrje tradicionalneho jěchanskeho swjedźenja we Łazu (Laasow) pola Wětošowa je so lětsa jako nowačk tež Chróšćan Měrćin Kubica wobdźělił. Na zarjadowanje, kiž so lětsa hižo 31. raz wotmě, běše jeho dołholětny znaty, wobsedźer křižerskich konjow z Błótow přeprosył. Byrnjež Měrćin Kubica spočatnje tróšku wahał – naposledk wón připraji. „Mějach sprawnje prajenje tróšku respekta, dokelž njejsym so do toho nihdy na tajkim wubědźowanju wobdźělił“, wón praji. Dalše wužadanje za njeho běše, zo prěni króć na 890 kg ćežkim zymnokrejnym konju jěchaše. Tute konje su wo wjele ćeše a sylniše hač te, na kotrychž je jako křižer jěchać zwučeny.

Wubědźowanski kóń z mjenom Lucky je w Błótach doma, běše pak wospjet w křižerskich procesionach w Hornjej Łužicy po puću. W Delnjej Łužicy rěka wubědźowanje „rejtowanje wó kołac“ a wone je hornjołužiskemu jěchanju po šćernišću podobne.