Wot lěta 2016 wobdźěli so stara koparska garda Sokoła Ralbicy/Hórki we wólnočasnej lize Zapadołužiskeho koparskeho zwjazka a přewjeduje tam winowatostne dypkowe hry. Ralbičenjo wuhraja partije na wulkim polu.

Planowanje sezony běše za zamołwiteho Zapadołužiskeho koparskeho zwjazka chětro ćežke. Mustwa mějachu hač do lońšeho 31. decembra přizjewić, hač hraja na wulkim abo na małym polu. Naposledk rozsudźištej so mustwje z Hórnikec a z Łaza za to, swoje hry na małym hrajnišću wuhrać. Tak přizjewi so jeničce sydom mustwow. Lěpšina pak je, zo wuhraje so mišterstwo zaso na zwučene wašnje z domjacymi a wonkownymi hrami přećiwo kóždemu cyłkej. Loni hrajachu w jednorym kole a ze slědowacymi play-offs.