Wšitke přeprošene cyłki starych knjezow so wobdźělili

Na mjeztym 28. koparskim turněrje starych knjezow wo pokal Serbskeho Sokoła z. t. w Chrósćicach je so pjatk pjeć wot pjeć přeprošenych cyłkow wobdźěliło. To bě chětro zwjeselace, wšako běchu so před dwěmaj lětomaj w Pančicach tři mustwa wobdźělili a loni w Ralbicach samo jenož dwě. Lětsa bě tomu hinak. Přewjedli běchu wubědźowanje stareje serbskeje koparskej gardy zamołwići Sportoweje jednotki Chrósćicy, kotřiž swjeći lětsa 45lětny jubilej, zhromadnje ze serbskimi Sokołami. Turněrowy modus a wšě prawidła běštaj turněrowy nawoda Jan Hrjehor a nowinarski rěčnik Sokołow Stefan Šmit hižo 24 hodźinow do turněra wšitkim zamołwitym připósłałoj. Tak bě do prěnjeje hry jasne, zo hraja po modusu kóždy přećiwo kóždemu, a to stajnje jenož 10 mjeńšinow. Přičina za to bě wulka ličba mustwow a zakop prěnjeje hry w 18 hodź. Nimo toho ličachu Sokoljo z tójšto hrami, kotrež 0:0 abo 1:1 skónča. Njerozsudne hry rozsudźachu z třělenjom jědnatkow, zo njebychu při wuličenju kónčnych městnow problemy měli. Pjeć wot dźesać hrow skónčichu 1:0 a pjeć 0:0.