Zawjazk Słowjenskej a Chorwatskej
Sym podpisała, dokelž ...
... sym wo tym přeswědčena, zo wobchowamy sej ze škitom narodnych mjeńšin w Europje mnohostronskosć. A za mnje je přewšo wažny aspekt, zo tak tež měr zachowamy. Při wšěch rozsudach ma so tole zasadnje wobkedźbować. Hłownje wšak dźe wo čłowjeske prawa a wuznam kultury. Globalne wužadanje, kulturu a politiku spóznawać jako wšotowaršnostny nadawk a jón zdobom dale wuwiwać, přiběra. Tohodla nimam to jeno za nadawk jednotliwych krajow, ale cyłeje Europskeje unije. Wona ma tuž tomule nadawkej wotpowědować a nima so wuwinyć swojej zamołwitosći napřećo wobydlerjam našeho kontinenta.
Podpisajće tež Wy na internetnej platformje pod www.minority-safepack.eu, pósćelće nam wobraz wo was a přidajće cyle skrótka w dwěmaj sadomaj, što je was pohnuło, wobydlersku iniciatiwu Federalistiskeje unije europskich narodnych mjeńšin FUEN Minority SafePack za škit narodnych mjeńšin w Europje podpěrać. Waš wobraz a tekst pósćelće k wozjewjenju redakciji Serbskich Nowin najlěpje na e-mailowu adresu: .
To a tamne (29.12.17)
Wulki woheń na sewjeru španiskeje dowoloweje kupy Mallorca je w běhu hodźin 75 hektarow lěsa zničił. Něhdźe 45 přisłušnikow wohnjoweje wobory, policije a ciwilneho škita je wčera dopołdnja płomjenja zhašało. Po oficialnych informacijach maja woni połoženje pod kontrolu. Woheń bě srjedu wječor z dotal njeznateje přičiny w horinach Tramuntana wudyrił. 60 chěžow dyrbjachu ewakuować. Wobydlerjo móžachu so mjeztym wróćić, kaž nuzowa słužba Balearow zdźěla.
Z wjerćiteho rěbla je wohnjowy wobornik w hessenskim Friedrichsdorfje swoju přećelku prosył so z nim zmandźelić, a bě wuspěšny. W košu rěbla jědźeše wón hač k třěšnemu woknu jeje domskeho a prošeše tam wo jeje „haj“. To pisa wohnjowa wobora na Facebooku. Njewšědna akcija wotmě so o sobotu do hód.
Wulki potencial
Drježdźany (SN/JaW). Koncepty ze Sakskeje su na cyłoněmskim inowaciskim wurisanju přeswědčili. 32 iniciatiwow je so we wobłuku programa „WIR! – Wandel durch Innovation in der Region“ za přichodne koło kwalifikowało. Mjez nimi je 14 ze sakskim wobdźělenjom a sydom ryzy sakskich projektow, zdźěli wčera zwjazkowe ministerstwo za kubłanje a slědźenje. Łužiski zwisk ma projekt „Lausitz – Life and Technology“ ze Žitawy.
Sakski hospodarski minister Martin Dulig (SPD) ma kwalifikaciju za wuspěch. „Tak pokazujemy znowa wulki inowaciski potencial a sylnu kmanosć regionalnych sakskich akterow, kooperować“, rjekny Dulig wčera w Drježdźanach.
Wuzwolene iniciatiwy dyrbja swoje regionalne koncepty hač do septembra 2018 dale wuwić. Wobsteja-li wone kónc přichodneho lěta před jurorami, smědźa so na financnu podpěru Zwjazka při zwoprawdźenju wjeselić. Cyłkownje chce tón dwanaće konceptow spěchować. Kóždy z nich móže z pjeć do wosom milionami eurow podpěry ličić.
40 mortwych po nadpadźe
Kabul (dpa/SN). Při samomordarskim nadpadźe na kulturny centrum w afghaniskej stolicy Kabulu bu znajmjeńša 40 ludźi morjenych a dalšich 30 zranjenych. Najprjedy bě so w twarjenju atentatnik rozbuchnył, informowaše dźensa rěčnik nutřkowneho ministerstwa Nasrat Rahimi. Jako ludźo na pomoc přichwatachu, rozbuchnyštej dalšej bombje před domom. Radikalnoislamistiscy talibanojo přez Twitter zdźělichu, zo woni za njeskutkom njetča.
Dźěło na Marsu napodobnić
Innsbruck (dpa/SN). Pusćina w Omanje stanje so klětu w februarje z testowym arealom za Marsowu misiju. Pjeć tak mjenowanych analognych astronawtow Awstriskeho swětnišćoweho foruma chce tři tydźenje zboka ciwilizacije pod po móžnosći realistiskimi wuměnjenjemi dźěłowe wuměnjenja na Čerwjenym planeće simulować. „Smy za kóždy zmylk dźakowni, kotryž zworamy“, rjekny nawoda ekspedicije Gernot Grömer powěsćerni dpa. Astronawća chcedźa z probami pódy pytanje za wodu napodobnić.
Greta Wehner 93lětna zemrěła
Rozbuchnjenje w superwikach Pjerekrjestok na Kalininowym naměsće z ...
Přećiwo teorijam zapřisahańcy
Za mjeńši zwjazkowy sejm
Wukubłanska wěstota trěbna
Drježdźany (SN). Wuslědki Krajneho monitora powołanske kubłanje su za frakciju SPD w Sakskim krajnym sejmje přiležnosć, na přichod wotchadnikow hłowneje šule na dźěłowych wikach skedźbnjeć. W lěće 2007 namaka 75 procentow tajkich šulerjow hnydom wukubłanske městno, loni bě jich jenož hišće 55 procentow. „Njesměmy pak přizwolić, zo su młodźi ludźo zanjechani. Tohodla trjebamy w Sakskej wukubłansku wěstotu za wšitkich młodostnych“, rjekny eksperta frakcije za dźěłowe wiki a młodźinsku politiku Hennig Hohmann wčera w Drježdźanach. Tu stej politika a hospodarstwo zhromadnje wužadanej.
Docpěć so tajka wěstota hodźi, hdyž wutworja po wšěm swobodnym staće młodźinske powołanske agentury, kaž je w koaliciskim zrěčenju zapisane. Posrědkowarnje wukubłanja, młodźinska pomoc a kubłanišća měli lěpje hromadźe dźěłać. Młodostni trjebaja podpěru z jedneje ruki, sej Homann pomina.
To a tamne (28.12.17)
Sněhowy wichor ze spěšnosću 144 kilometrow na hodźinu je kurjerku na ruskej kupje Sachalin z balkona zwěł, a to ze štwórteho poschoda. Na zbožo je 70lětna mjechko we wulkej wějeńcy „přizemiła“ a sej „jenož“ tři rjebła a ruku złamała. Dokelž pak njeje chorobne awto přez wulki sněh k njej jěć móhło, su žonu z kolesowym nakładowakom k lěkarjej dowjezli.
Hody su znate jako swjedźeń lubosće. Zo pak tomu přeco tak njeje, dyrbješe policija lětsa w porynsko-pfalcskim Koblenzu dožiwić. Hnydom dźewjeć razow mějachu zastojnicy hodowne swjate dny wšelake rozestajenja w swójbach wujednać, kaž tamniši policajski rěčnik wozjewi. Hłowna přičina rozdźělnych měnjenjow bě ta, zo běchu wobdźěleni sej do toho prosće přewjele alkoholiskich napojow popřeli. Zajeć pak policija nikoho njetrjebaše.
