Zhromadna próca
Ličba stupała
Drježdźany (dpa/SN). Dale a wjac wobydlerjow Sakskeje ma swoje dźěłowe městno zwonka swobodneho stata. Minjene dźesać lět je so ličba dojězdźowarjow wo něhdźe dźesaćinu na 134 000 powjetšiła. Kóždy pjaty z nich dźěła w Bayerskej. Slěduja Saksko-Anhaltska ze 16,9 procentami, Durinska z 12,5 proc. a Braniborska z 8,7 proc.
Za ličbami naprašował bě so zapósłanc Lěwicy w krajnym sejmje Nico Brünler. 41lětny Kamjeničan wuwiće jara kritisce wobhladuje. „To njetyje swójbnej zhromadnosći a načinja potrjechenym wjele stresa.“
To a tamne (14.09.16)
Po wšěm zdaću bě sornikej přehorco, zo je minjenu nóc do priwatneho poola skočił. Po wochłódnjenju pak njeje z njeho hižo sam won přišoł. Wobydlerka to wobkedźbowaše, zawoła policiju a rozprawješe jej wo wbohim žatku w juhohessenskim Höchstu. Zastojnicy jej radźachu, zo ma młodeho sornika cyle jednorje z wody wućahnyć, štož so jej skónčnje poradźi. Kaž wona měnješe, je so zwěrjeću wulět najskerje spodobał.
89lětny předawar lodu móže so skónčnje na wuměnk podać. Přez lěta bě wón wšědnje z wozom po puću a předawaše ludźom mexiski lód. Fidenzio Sanchez bě wot swojeho dźěłoweho městna wotwisny, wšako dyrbješe so wo swójbu starać. Z pomocu crowdfundinga je fotograf Joel Cervantes Macias nětko za muža pjenjezy zběrał. Přez akciju nahromadźi Macias 277 000 dolarow.
Wosebita znamka wušła
Vatikan (B/SN). Na swjatoprajenje maćerje Terezy spomina Vatikan z wosebitej listowej znamku. Po informacijach z Watikanskeho zarjada za filateliju a numismatiku je 95centowa znamka z wobrazom noweje swjateje ze zapisom „Swjata Tereza z Kalkutty“ na předań.
Biskop so jasnje zwuraznja
Drježdźany (B/SN). Nowy katolski Drježdźansko-Mišnjanski biskop Heinrich Timmerevers chce tež k towaršnostnym temam jasnu poziciju zabrać. „Sewjerni Němcy“ so hewak tak přez kwětku njezwuraznjeja, ale skerje direktnje“, rjekny Timmerevers na přijeću w Drježdźanach, na kotrež bě sej wón zastupjerjow z politiki, kultury a towaršnosće přeprosył.
Celibat reformować
Bonn (B/SN). Njedostatka katolskich měšnikow dla žada sej Centralny komitej němskich katolikow (ZdK) reformu celibata. „Mamy hižo dobrych a angažowanych diakonow – to su woženjeni mužojo“, měni prezident ZdK Thomas Sternberg. „Hdyž wjace hinak njepóńdźe, zo w dušepastyrstwje personelnje wukrawimy, a hdyž je celibat při tym zadźěwk, potom ma so wón, dokelž je mjenje wažny, złahodnić“, Sternberg potwjerdźa.
Pozdatni terorisća zajeći
Karlsruhe/Wiesbaden (dpa/SN). Při antiterorowych racijach w Schleswigsko-Holsteinskej a Delnjej Sakskej su dźensa rano třoch pozdatnych syriskich teroristow zajeli. Zwjazkowi prawiznicy wumjetuja mužam w starobje 17 do 26 lět, zo běchu w nadawku teroristiskeje organizacije Islamski stat do Němskeje přišli, hdźež dyrbjachu wotpowědny nadawk spjelnić abo znajmjeńša na dalše informacije čakać. Dotalne přepytowanja pak njejsu žane pokazki na konkretne nadawki wujewili.
Wojersku móc demonstrowali
Seoul (dpa/SN). Po dotal najsylnišim atomowym tesće Sewjerneje Koreje su jednotki USA swoju wojersku móc demonstrowali a dwaj strategiskej dołhočarowej bombowcaj nad Južnej Koreju lećeć dali. Lětadle typa B-1B, kotrejž móžetej tohorunja atomowe brónje transportować, stej wot zepěranišća južnje Seoula startowałoj. Demonstracija bombowcow je jenož přikład wojerskich kmanosćow zwjazkarstwa USA z Južnej Koreju.
Chce wólbny bój dale wjesć
Město Zły Komorow wuwiwa so dźeń a bóle na turistiski magnet ...
Hajitaj dobru wzajomnosć
Drježdźany (K/SN). Sakska a Čěska přezmjeznje derje hromadźe dźěłatej. Kaž móžetej minjenu periodu spěchowanja přez EU pozitiwnje hódnoćić, wonej tež do lěta 2020 trajacy kooperaciski program wuspěšnje zwoprawdźatej. „Dotal je hižo 41 mjezu překročacych projektow přidźělenske zrěčenje dóstało. Z tajkim dóstachu projekty z europskeho fondsa za wuwiwanje regionow 60 milionow eurow“, rjekny sakski minister za wobswět a ratarstwo Thomas Schmidt.
