Prezident USA Obama: Trump je njekmany
Ludomordarstwo wopominali
„Riskantnu praksu skónčić“
Zeleni maja składowanje popjeła z milinarnjow za njezakonske
Drježdźany (dpa/SN). Zeleni so w Sakskej praktikowanemu składowanju popjeła z brunicowych milinarnjow spjećuja. „Sym Lipšćanskemu statnemu rěčnistwu skóržbu přećiwo njeznatym zapodał“, rjekny fachowc za energijowe naležnosće w frakciji Zelenych krajneho sejma Gerd Lippold wčera w Drježdźanach. Wón powołaše so při tym na wuslědk najnowšeho prawniskeho posudka, kotryž běchu Zeleni skazali.
Po informacijach Lippolda wobsahuje popjeł ćežkometale kaž kopor, kadmium, chrom, cynk, wołoj, nikl, žiwe slěbro a talium. Najebać to njeskładuja wotpadki kaž w druhich krajach na deponijach, ale w přirodźe. Tak móhło k zanjerodźenju dnowneje wody dóńć. „Tule riskantnu praksu měli najspěšnišo skónčić.“
Hišće lětsa zwučować
Sobu financować
Berlin/Budyšin (SN). Zwjazkowe knježerstwo je dźensa w Berlinje nowy zwjazkowy plan wobchadnych pućow wobzamknyło. Tam je elektrifikacija čarow Drježdźany–Zhorjelc a Kamjenica–Lipsk do najsłabšeje kategorije „potencielna potrjeba“ zastopnjowana. Ze sakskeho wida njeje to po słowach zapósłanče Zwjazka 90/Zelenych w krajnym sejmje Katje Meier „přiležnosć wulce wyskać“. Wona widźi wobchadneho ministra Martina Duliga (SPD) nětko jako přisłušneho za to, so pola Němskeje železnicy za tejle wažnej infrastrukturnej předewzaći doraznje zasadźić. „Zo bychu so šansy zwyšili, čarje Drježdźany–Zhorjelc a Kamjenica–Lipsk elektrifikować, měło sakske knježerstwo železnicy sobufinancowanje namjetować“, poruči Meier. Wšako su druhe zwjazkowe kraje kaž Schleswigsko-Holsteinska, Bayerska abo Badensko-Württembergska sebi samym wažne železniske projekty sobu financowali, abo činja to aktualnje.
Ze zahajenjom nowotwara železniskeho mosta nad Zeppelinowej w Budyšinje twori so wažne wuměnjenje za elektrifikaciju zwiska Drježdźany–Zhorjelc.
To a tamne (03.08.16)
Wulět ćeknjeneje kruwy w Pfalcy je so po štyrjoch tydźenjach skónčił. Skoćo, kotrež słucha na mjeno Johanna, su wčera w Kaiserslauternje popadnyli. Kruwa bě so na ležownosć zawoda zabłudźiła. Jako zawodna wohnjowa wobora dojědźe, wona spočatnje ćekny. Sobudźěłaćerjo pak móžachu ju na wobhrodźenu płoninu ćěrić. Johanna bě spočatk julija z rězarnje ćeknyła a policiju zas a zaso za nós wodźiła. Nětko chcedźa ju na statok smilnosće dowjezć, kaž rěkaše.
Camping na njewšědnym městnje je we wokrjesu Teltow-Fläming zasadźenje policije zawinił. Ludźo běchu ju informowali, dokelž někotre wosoby na kromje B 96 za campingowym blidom sedźo jědźachu. Policija wšak móžeše pad wujasnić: Wulětnikarjam bě so awto skóncowało. Čakajo na pomocnu słužbu činjachu to najlěpše ze situacije.
Nabožina je zakładne prawo
Erfurt (B/SN). Katolski běrow Durinskeje wozjewi k próstwje krajneje frakcije strony AfD „Nabožinsku swobodu škitać – namócnym přeńdźenjam na křesćanskich požadarjach azyla zadźěwać“ nowinsku zdźělenku. Ordinariatny rada Winfried Weinreich pisa: „Dźiwajo na mnohe nadpady na azylowe přebywanišća staja so problematika škita wšitkich ćěkancow, njewotwisnje wot jich nabožinskeje přisłušnosće. Nabožinska swoboda w našim kraju pak njepłaći jeničce za křesćanskich požadarjow azyla. Tele zakładne prawo přisteji kóždemu čłowjekej, njewotwisnje wot nabožiny. To wuzamkuje kóždužkuli nabožnje motiwowanu diskriminaciju – wězo tež napřećo křesćanam.
Ličba katolikow přiběrała
Politikarka AfD požadana
Prěni raz wotměja so lětsa wot 3. septembra hač do 3. oktobra Budyske tydźenje demokratije, a to pod hesłom „Přidaj swoje tři najgroše/Gib deinen Senf dazu“. Mnozy, tež priwatnicy, su wšelake zarjadowanja přizjewili.
Budyšin (SN/CoR). Dobry měsac do koncertneho zazběha, mjez druhim ze skupinu Jolly Jumper 4. septembra w 14 hodź. na hłownym torhošću, je zarjadowanska protyka derje pjelnjena. Dohromady je dotal něhdźe 60 projektow přizjewjene. Mjez druhim budu to dźěłarnički, čitanja, filmy a wustajeńcy. Wot 5. do 9. septembra planuje Domowina „dny serbskeho dialoga“. 5. septembra we 18 hodź. budźetej w Kamjentnym domje impulsowy referat iniciatiwy Serbski sejm wo móžnym parlamenće kaž tež diskusijne koło. Wo swojich lětach wandrowstwa powěda Chróšćan Franc Čornak 27. septembra šulerjam Budyskeje Serbskeje wyšeje šule w měšćanskej bibliotece.
Trump: Clinton je čert
Mechanicsburg (dpa/SN). Donald Trump Hillary Clinton dale masiwnje nadběhuje. Na wólbnobojowym zarjadowanju w měsće Mechanicsburg w staće USA Pennsylvania mjenowaše kandidat republikanow swoju demokratisku kontrahentku w boju wo zastojnstwo prezidenta „čert“, kaž medije kraja rozprawjeja. Kritizujo bywšeho kandidata Bernieja Sandersa, kiž Clinton mjeztym podpěruje, wón praji: „Wón so z čertom nasadźuje. Wona je čert.“ Je to prěni króć, zo Trump tónle wuraz wužiwa. Dotal bě ju „koruptnu“ mjenował.
Přilubjena pomoc wuwostawa
Berlin (dpa/SN). Wot mjezynarodneho zhromadźenstwa statow přilubjena pomoc Grjekskej k zmištrowanju krizy ćěkancow dla kraj dotal lědma docpěwa. Wo tym piše nowina Bild. Z přilubjenych 1 580 zastojnikow europskeje pomjezneje agentury Frontex je dotal runje 66 w Grjekskej. Nimo toho je EU město připowědźenych 475 fachowcow za azyl hakle 92 a město 400 přilubjenych tołmačerjow hakle 61 pósłała.
Bayerska wobskorži VW
