Štóž je minjene dny sportowe powěsće w Sakskej sćěhował, tón je zawěsće tež wo skandalu na olympiskim zepěranišću w Kamjenicy słyšał. Tam trenuja tež ćěłozwučowarki. Někotre z nich su so zjawnje na znatu trenarku Gabrielu Frehse hóršili. Wona pak je so sama tež hižo wuprajiła a měniła, zo mnohe wumjetowanja njetrjechja.
Stefan Möller, pochadźacy ze Šunowa, bydleše třiapoł lěta w Kamjenicy a studowaše tam rehaprewenciski a fitnesowy sport. Mjez druhim dźěłaše tež na zepěranišću a tam wšitke wosoby, wo kotrychž je tuchwilnje rěč, tež mjenje abo bóle zeznał. Što k situaciji měni, je wón Jurjej Bjeńšej powědał.
Stefano, w zjawnosći su so někotre ćěłozwučowarki před tydźenjomaj přećiwo swojej něhdyšej trenarce Gabrieli Frehse wuprajili. Sće ze wšitkimi wosobami tehdy kontakt měł?
S. Möller: Z Paulinu Schäfer a Sophie Scheder, naposledk mjenowana wšak njeje so negatiwnje wuprajiła, sym lěto do Olympiskich lětnich hrow w Rio de Janeiru na atletice dźěłał, ženje pak hromadźe z Gabrielu Frehse. Tež z tamnymi ćěłozwučowarkami mějach kontakt, haj.