Hdyž rěkaš Beno, Pětr abo Michał, so ći drje wjele njewšědneho stać njemóže. Kóždy na prěni pohlad z ryzy pisomneje formy wučita, štó sy a će wotpowědnje narěči. Tež listy najwšelakorišeho razu wot zarjadow abo druhdźe dóstawaš prawje adresowane a sy-li na přikład pola lěkarja, tež hnydom wědźa, kotremu splahej maja će přirjadować. To wšo je zwjetša samozrozumliwe. Nic pak, hdyž staj so staršej za mjeno rozsudźiłoj, kotrež w našich kónčinach prajimy raz cyle tak jara rozšěrjene njeje.