Na cilowej čarje sezony 2022/2023 je regionalny koparski FC Energija pilnje dypkował a tež najwjetši konkurent je „sobu hrał“. Sobotu móhli Choćebuženjo doma před swójskim publikumom mišterstwo swjećić. Georg Zielonkowski rozprawja

Germania Halberstadt –

Energija Choćebuz 0:3 (0:3)

Zestawa hosći: Bethke – Hasse, Hildebrandt (57. Böhmert), Slamar, Borgmann - Badu (57. Abu-Alfa), Hofmann (46. Kujović), Eisenhuth, Hottmann (75. Wähling), Thiele (46. Heike), Shcherbakovski.

Choćebuženjo dźěchu koncentrowani do hry přećiwo předposlednjemu tabulki, štož žadyn mamutowy nadawk njebě. Specielnje w prěnim połčasu je faworit hosćićelam lědma powětr k dychanju dał. Skónčnje wuži so tež wjetši dźěl šansow po zahorjacej hrě přez křidle. Nawróćenaj Malcom Badu a Jann Shcherbakowski dźakowaštaj so w centralnej poziciji za precizne předdźěło teamowych kolegow. Hladajo na „finale“ sobotu bě so trenar Claus-Dieter Wollitz, kiž dyrbješe hru chłostanja dla na přihladowarskej tribunje sćěhować, w srjedźnym polu Maksimiliana Oesterwelga wzdał. Tež Timmy Thiele bu před 736 přihladowarjemi k přestawce z pola wzaty.

SJ Chrósćicy II –

HZ Wóslink/Skaskow/Kulow II 2:0 (0:0)

Zestawa domjacych: K. Mark – C. Handrik, Kola, Zynda, S. Handrik (60. Rätze), Wornar, Domaška (88. M. Mark), Liznar, Donat, Paška (75. Matik), Zahrodnik (88. Čornak)

Njedźelu dóńdźe na Chróšćan hrajnišću k tak mjenowanej šěsćdypkowej hrě mjez tamnišej rezerwu a hrajnym zjednoćenstwom z Wóslinka, Skaskowa a Kulowa. Z dobyćom móhli so domjacy do srjedźneho pola tabulki podać a tak změrowani do finala sezony startować.

Sokoł Ralbicy/Hórki –

FV Ottendorf/Okrilla 4:1 (2:0)

Zestawa domjacych: Chr. Gloxyn – T. Wałda, A. Wałda, Rawš, M. Matka (87. Kř. Matka), Šewc, D. Gloxyn, Rachela (61. P. Šołta), Korjeńk, Kř. Bejmak (84. Kunze), Domaška

Přećiwo Sokołam z Ralbic tuchwilu we wokrjesnej wyšej lize pře wjele mustwow hrać njeby chcyło, wšako bě to njedźelu hižo šeste dobyće zasobu. Wosebje ofensiwa ze starymaj zajacomaj Pětrom Domašku a Křesćanom Bejmakom je momentanje chětro efektiwna.

W stadionje Přećelstwa su fanojo njedźelu hižo po štyrjoch mjeńšinach wyskali, jako Domaška z ominozneho dypka wěsće přetwori. Po róžku bu mjenujcy Aleksander Wałda sfoulowany, čehoždla sudnik jědnatku postaji. Sokoljo njewjeselachu so jenož nad nawjedowanjom, ale tež zo skónčnje, po třoch přetřělenych pokutnych kopach, zaso raz jednu jědnatku přetworjachu. Jenož dźesać mjeńšinow pozdźišo steješe hižo 2:0 za domjacych. Bejmak bu w šěsnatce derje přihraty, tak zo bjez problemow zwyši. Hač do wothwizdanja prěnjeho połčasa bychu Sokoljo bjezdwěla hišće tři, štyri dalše wrota docpěć dyrbjeli, tola před wrotami zwrěšćichu.

Rakečanske ST II –

SJ Chrósćicy II 0:1 (0:0)

Zestawa hosći: Škoda – Sćapan (69. Rätze), Kola, Kreuz, Čornak, Wornar, Domaška, Liznar, Dridiger-Šołta, Wenzel (86. Dźisławk), Zahrodnik

Poslednju njedźelu apryla bě so koparska rezerwa Chróšćanskeje sportoweje jednotki do Rakec na hru přećiwo tamnišej rezerwje podała. Z dobyćom bychu so wot poslednich městnow tabulki wotsalić móhli, wšako steješe jim z Rakečanami direktny konkurent napřemo.