Delnjoserbska publicistika je nimale dospołnje zjawnje přistupna

Budyšin/Choćebuz (SN/bn). Serbski institut (SI) zdźěla, zo stej nastupajo digitalizaciju dalšej krokaj wuspěšnje zmištrowanej. Tak su mjeztym na platformje dolnoserbski.de bjezmała wšitke wudaća Noweho Casnika kaž tež historiskich předchadnikow delnjoserbskeho periodikuma přistupne. Nowy „Korpus nowin 1947–2016“ wopřijima 68 lětnikow, to rěka 3 400 jednotliwych wudaćow. W tekstach, kotrež so „w naročnym dźěle wobdźěłachu, zamóže wužiwar z pytanjom za zakładnej formu wšitke flekciske formy a pisanske warianty wuslědźić. Z tym je přistup k datam bjez wjetšich zadźěwkow móžny“, w aktualnym wokolniku SI rěka. Po słowach direktora instituta dr. Hauke Bartelsa, kotryž projekty digitalizacije nawjeduje, „je nimale cyły Casnik we wysokej kwaliće digitalnje přistupny. Z tym smy wažny měznik po puću k dospołnemu digitalizowanju docpěli.“ W tychle zjawnje a zdarma wužiwajomnych nowinarskich tekstach móže wužiwar jednotliwe słowa, wurazy abo kombinacije słowow pytać, zo „by wuslědźił, kak so rěč wužiwaše.