Prěni raz towarstwo Domowiny a nošer mandata AfD so dźěliłoj

Budyšin/Choćebuz (SN/mb). „Pioněrske dźěło“ je towarstwo „Gromaźe“ wukonjało, kaž su njedawno w zdźělence pisali: Jako prěnje serbske towarstwo běchu wobzamknyli, nošerja mandata AfD wuzamknyć. Potrjecheny běše Hanzo Wylem-Keł z Huštanja, kotryž docpě w lětušich wólbach Serbskeho sejma na delnjoserbskej lisćinje druhe městno po Janje Kosyku, kandidaće z najwjac hłosami. Loni je Keł, předsyda regionalneho politiskeho zjednoćenstwa Łužiskeje Aliancy, we Wětošowje, městačku ze 7 600 wobydlerjemi w Błótach, na lisćinje AfD za zhromadźiznu měšćanskich zapósłancow kandidował. Wón dósta 1 816 hłosow a steji z tym na čole wšěch kandidatow. Z čłonom AfD wón njeje.