Diskusija wo wobchadźenju z prawicarsko-ekstremistiskej stronu

Podstupim (dpa/SN). Braniborski ministerski prezident Dietmar Woidke (SPD) žada sej jasnu konfrontaciju z AfD na runinje­ politiskich wobsahow. „Dyrbimy so z AfD politisce rozestajeć, na přikład tež wo energijowej politice“, rjekny Woidke­ powěsćerni dpa. „By hižo zajimawe było, kelko ludźi by w Braniborskej swoju domiznu zhubiło, dokelž žada sej AfD załoženje nowych brunicowych jamow.“­

Zarjad za wustawoškit je AfD w meji jako z wěstosću prawicarsko-ekstremistisku stronu zastopnjował. Přećiwo tomu so strona ze skóržbu sudnisce wobara. Wona sej žada, zo zamołwići dopokazy za swój posudk wozjewja. Nutřkowne ministerstwo mjeztym zdźěla, zo so tole přichodny štwórtk stanje.

Woidke AfD w tym zwisku namołwja, zo měła so wot prawicarskich ekstremistow w swojich rjadach dźělić. „Puć za AfD, zo so z normalnej stronu stanje, je jednory: Hdyž ekstremistow prosće ze strony ćisnje“, ministerski prezident rjekny. „W Braniborskej njeje AfD jenož z ekstremistami překisana, woni ju mjeztym dominuja“, Woidke rjekny.

Lětuši CSD w Budyšinje wupadaše zdźěla kaž pisany swjedźeń swójbow, wjele młodych staršich je so wobdźěliło. Potajkim dosć ludźi, kotřiž njejsu „queerni“, ale chcychu pokazać: W našich kónčinach njesmědźa prawicarjo postajować, štó so z kim a kak w zjawnosći pohibuje. Do swobodneho kraja słuša swoboda žiwjenskeho wašnja. Wšojedne, hač ludźo w rěči bjesaduja, kotruž druzy njerozumja. Abo hač je tež porikow muži abo žonow, kotrež ruku za ručku po měsće dundaja. To snadź tež kóždy njerozumi, štož pak zlě njeje. Kaž wčera serbscy wobdźělnicy zwuraznichu: Dźe wo tolerancu, nichtó njetrjeba wšo za dobre měć, štož dokoławokoło sebje zaznawa. Na kóncu njech „lubosć dobudźe“, kaž bě hesło na CSD, a lubosć ma tež we Łužicy „wjele rjanych wobličow“, tak rěčnica. Brunym skupinam, kotrež so wupěraja kaž paramilitarne črjódy NSDAP za čas Weimarskeje republiki, mamy pak jasnu intolerancu pokazać. Marcel Brauman

Składnostnje 227. narodnin molerja Carla Blechena su tydźenja wutoru we wulkej hali Choćebuskeje lutowarnje drohoćinku wustajili: Originalnu mólbu wuměłca „Mortwa kurotwa“, kotruž bě Załožba wjercha Pücklera za trajnu wustajeńcu w Rogeńskim parku kupiła. Z mólbu bě 1798 w Choćebuzu rodźeny wuměłc wokoło 1833 swoju wulku wuměłsku zdokonjanosć dopokazał. Přikład běchu jemu swój čas nižozemscy mištrojo 17. lětstotka. Wobraz zdobom znazornja, kak wuskaj stej rjanosć přirody a brutalita namócneje smjerće zwjazanej. Foto: Michael Helbig

Zašły pjatk rozžohnowachmy so z Lüderom Hoeftom, wučerjom na wuměnku a ludowym wuměłcom z Małeho Wjelkowa, kotryž bě 21. junija w starobje 80 lět zemrěł.

Serbske jejko, to bě jemu symbol. Wuhladach je před lětami na antenje jeho awta, a tak so zeznachmoj. K Serbstwu so wuznawać, to bě jemu wažne. Tohodla wobleče so hdys a hdys swoju mužacu drastu ewangelskich Serbow wokoło Budyšina, kotruž bě jemu mandźelska zešiła a wušiwała. Wosebje na wikach jutrownych jejkow, hdźež techniku škrabanja a stare regionalne mustry po swojim dźědźe Emilu Wowčerju-Wjelkowskim pokazowaše, so stajnje k swojim korjenjam wuznawaše a tež serbowaše. W Spěchowanskim kruhu za serbsku ludowu kulturu běštej jeho wutrobitosć a wjesoła mysl witanej. Přez lěta šěrješe na nalětnich wikach tež zwonka Łužicy wědu wo Serbach, hdźež druhdy jako braška wustupowaše. Ze sćerpnosću a wulkej lubosću sposrědkowa dźěćom hromadźe ze swojej mandźelskej w Radworskim horće prěnje techniske kmanosće za wóskowanje a škrabanje jejkow.