Trump po puću do Šotiskeje
Washington (dpa/SN). Prezident USA Donald Trump je dźensa do ródneje domizny swojeje maćerje Šotiskeje lećał. Po informacijach Běłeho domu wopytuje wón hač do wutory mjez druhim Turnberry kaž tež Aberdeen. We woběmaj kónčinomaj wobsedźi Trump wjacore golfowe hrajnišća.
Zetkać chce so Trump tež z britiskim premierministrom Keirom Starmerom, zo by z nim wo hospodarskich poćahach w zwisku z cłami USA na britiske wudźěłki rěčał. Přećiwnicy Trumpa su protesty připowědźili. Woni wumjetuja prezidentej USA zatajenja w zwisku z aferu wokoło seksualneho złóstnika Epsteina a wuzamknjenje kritiskich medijow USA z mustwa jeho přewodźacych nowinarjow.
Macron stat Palestinu připóznawa
Paris (dpa/SN). Francoski prezident Emmauel Macron je připowědźił, zo chcył Palestinu jako stat připóznać. Na hłownej zhromadźiznje UNO w septembru chce wón tole oficialnje wozjewić, francoski prezident w Parisu připowědźi. Wón so nadźija, zo tale kročel měrej w regionje přinošuje. Palestinski stat ma Israel připóznawać, sej Macron žada.
Islamistiska Hamas je připowědź z Parisa jako „kročel do praweho směra“ witała. Iniciatiwa je pozitiwna kročel na puću sprawnosće a samopostajowanja na dobro Palestinjanow, w zdźělence rěka.
Porno tomu israelski ministerski prezident Benjamin Netanjahu připowědź Francoskeje raznje zasudźa. Tajka kročel by terorizm Hamas runjewon mytowała.
Tež USA připowědź Macrona raznje zasudźa. Wonkowny minister Marco Rubio mjenuje jón „hruby rozsud“, kiž jenož propagandźe Hamas słuži. USA su najwažniši zwjazkar Israela a jón politisce, wojersce a hospodarsce podpěruja.
Nowa komisija islamizma dla
Drježdźany (dpa/SN). Sakski krajny kriminalny zarjad (LKA) ma trěću wurjadnu komisiju za bój přećiwo politisce motiwowanej kriminaliće w swobodnym staće dóstać. Islamizm a druhe nabožne ideologije maja w srjedźišću jeje dźěła stać. Rěčnik LKA Kay Anders je nowinarjam wobkrućił, zo tuchwilu nowu wurjadnu komisiju planuja. Dotal eksistujetej w Sakskej wurjadnej komisiji za prawicarski ekstremizm (Soko Rex) a za lěwicarski ekstremizm (Soko Linx).
„Pruwujemy, wurjadnu komisiju přećiwo islamizmej zarjadować, dokelž zwěsćamy w tutym wobłuku radikalizowanje a dokelž bě w zwisku z wólbami zwjazkoweho sejma tójšto islamistisce motiwowanych nadpadow“, rjekny Denis Kuhne, nawoda wotrjada za škit stata w krajnym kriminalnym zarjedźe nowinarjam.
Nutřkowne ministerstwo zdobom na to skedźbnja, zo je strach islamistiskeho terora po nadpadźe Hamas na Israel w oktobru 2023 a sćěhowacym zahajenju wójny Israela přećiwo Hamas w Gazaskim pasmje widźomnje přiběrał. Humanitarna katastrofa mjez Palestinjanami je nimo toho přičina protestnych akcijow.
To a tamne (25.07.25)
Z kolesom jěduceho paducha žiwidłow je policija w Nordhausenje zajała. Sobudźěłaćerjo wobchoda běchu paducha při kradnjenju wobkedźbowali a při zachodźe zadźerželi, doniž policija njepřijědźe. Zastojnicy zwěsćichu, zo bě tež koleso, z kotrymž bě paduch přijěł, pokradnjene. Policiji wšak bě 31lětny podobnych njeskutkow dla derje znaty.
Wobšěrna kontrola policije drogow w nadróžnym wobchadźe dla bě w Heidelbergu z wida zastojnikow dosć wuspěšna: Při kontroli 72 awtow a 80 wosobow su na wšěch 16 šoferow lepili, kotřiž stejachu pod wliwom drogow. Potrjechench dowjezechu do chorownje, zo bychu jim krej wotewzali. W jednym padźe sćazachu jězbnu dowolnosć na blaku. We wjacorych awtach namakachu drogi. Policija bě dróhu w Heidelbergu tak zaraćiła, zo njemóžeše so nichtó kontroli wuwinyć.
Zelenskyj připowědźa zakoń
Kijew (dpa/SN). Hladajo na nowe protesty we wjacorych ukrainskich wulkoměstach je prezident Wolodymyr Zelenskyj nowy zakoń za dźěło organow přećiwo korupciji připowědźił. Zakoń zaruča wotmołwu na wšitke starosće demonstrantow a njewotwisnosć zarjadow za bój přećiwo korupciji., To přilubi Zelenskyj w swojim wječornym widejowym poselstwje. Zdobom wumjetowaše wón institucijam znowa „wobwliwowanje ze stron Ruskeje“.
Klima zdobom ludowe prawo
Den Haag (dpa/SN). Statam, kotrež mjezynarodne zawjazki za škit klimy njespjelnja, hrozy zasudźenje ze stron najwyšeho sudnistwa UNO. Kraje, kotrež ničo přećiwo změnje klimy nječinja, ranja prawo ludow, zdźěli Mjezynarodne sudnistwo w Den Haagu. Stejišćo sudnistwa njeje drje prawnisce zawjazowace, wobwliwuje pak po měnjenju fachowcow klimowe procesy. Posudk sudnistwa je za nich historiski.
Hamas wotmołwiła
Němske narodne koparske mustwo žonow je wčera wječor we ...
Merz a Macron sej přezjednaj
Berlin (dpa/SN). Zwjazkowy kancler Friedrich Merz (CDU) a francoski prezident Emmanuel Macron staj w swětopolitiskich ćežkich časach wuznam němsko-francoskeho partnerstwa wobkrućiłoj. „Stejimy na zakładźe lětdźesatki trajaceho wuskeho němsko-francoskeho přećelstwa“, rjekny Macron na spočatku swojeho wopyta w Berlinje. Merz potwjerdźi, zo je jemu dobry poćah do Francoskeje tež wosobinsce nutrna naležnosć. Dojednałoj staj so wobaj mjez druhim na to, zo w prašenju zakitowanja wušo hromadźe dźěłataj a wšelake brónjowe projekty wušo wothłosujetaj.
Hladajo na cłownu zwadu z USA běštaj sej Merz a Macron přezjednaj, zo tež tónle problem zhromadnje zmištrujetaj.
Ruske lětadło znjezbožiło
Tynda (dpa/SN). Na wuchodźe Ruskeje je pasažěrske lětadło znjezbožiło. Tole zdźěla ruske ministerstwo za ciwilny škit. W lětadle, kotrež bě do Tyndy w Amurskej kónčinje njedaloko mjezy Chiny po puću, bě po informacijach guwernera Wassilija Orlowa 49 ludźi.
Mašina typa Antonow AN-24 je so dźensa z radarowych wobrazowkow zhubiła. Pilot dyrbješe prěni pospyt přizemjenja přetorhnyć a přizjewi zamołwitym techniske problemy. Na to so zwisk k njemu skónči. Wohnjowi wobornicy namakachu so palace lětadło 15 kilometrow wot lětanišća zdalene. Bahna a tajga dźěła pomocnikow poćežowachu. Mašina bě nimale 50 lět stara, ale pječa hišće technisce w porjadku.
Ruska a Ukraina wuměnitej jatych
Istanbul (dpa/SN). Ruska a Ukraina stej so na dalšu wuměnu jatych dojednałoj. Tole je wuslědk mjezsobnych wuradźowanjow w turkowskim Istanbulu. Tak wuměnitej wobě stronje 1 200 jatych, nawoda ruskeje delegacije Wladimir Medinski zdźěli. Přepodać budu tež wjacorych ćežko zranjenych. Medinski dale připowědźi, zo chce Ruska Ukrainje ćěła 3 000 padnjenych ukrainskich wojakow přepodać. Rozmołwy su wčera wječor w Istanbulu zahajili. Wone njejsu ani hodźinu trali.
Turkowski wonkowny minister Hakan Fidan, kotryž bě Istanbul jako městno zetkanja namjetował, chcyše poprawom přiměr na fronće docpěć. Tutón by móžny zakład za měrowe zrěčenje było. Wot toho pak stej Ruska a Ukraina wokomiknje daloko zdalenej. Fachowcy tuž njewočakowachu, zo so krajej w mjeztym třećim kole jednanjow na to dojednatej. Mjezsobne nadběhi na fronće dale pokročuja. Ruska wobstawa na swojich žadanjach: Tuchwilu chce wobsadźene kónčiny na wuchodźe a juhu Ukrainy swojemu teritorijej přirjadować.
„Přiroda najlěpši zwjazkar“
Minister za wobswět chce bój přećiwo změnje klimy zesylnić
Berlin (dpa/SN). Zwjazkowy minister za wobswět Carsten Schneider je bój přećiwo změnje klimy jako „najwjetše socialne prašenje našeho časa“ wuzběhnył. W tym zwisku potwjerdźi politikar SPD w rozmołwje z nowinarjemi, zo bohate kraje ze swojim konsumom a swojim nastajenjom hladajo na přirodu najwjetšu ekologisku škodu na swěće zawostajeja. Schneider rjekny tole składnostnje dźensnišeho „dnja přećeženja zemje“, z kotrymž je čłowjestwo přirodne zemske pokłady za tute lěto hižo přetrjebało. Wotnětka čerpaja ludźo pokłady, kotrež njemóže zemja na přirodne wašnje hižo narunać.
