Dobry wothłós na druhi raz wuhotowany festiwal Witaj w Miłoćicach

Miłoćicy (SN/bn). Druhi festiwal Witaj přiwabi minjeny kónc tydźenja dohromady něhdźe 300 wopytowarjow k Miłočanskej skale. Program wopřijimaše nimo koncertow třoch skupinow a dweju solistow sydom dźěłarničkow, wjacore wodźenja, filmowe předstajenja, performance a přednošk. Zazběh tworješe rozmołwne koło wo serbskim kulturnym a kreatiwnym hospodarstwje. Mjez druhim diskutowachu wo spěchowanskich móžnosćach zwonka zwučenych serbskich strukturow kaž tež wo wutworjenju syće za wuwiwanje serbskeje hudźby. Slědowacy referat dr. Grit Lemke „Samojo a indigeny film – model wuspěcha za serbski film?“ słužeše jako přikład, kak hodźało so tele wuměłstwo přichodnje we Łužicy wuwiwać. Nastupajo zawěsćenja filmoweho herbstwa ma Lemke Serbow za awantgardu. Hla­dajo na financowanje produkcijow, kwa­lifikowany personal a widźomnosć we wjetšinowej towaršnosći pak wobstej z jeje wida dale potrjeba jednać.