Kamjenc swjeći lětsa 800. róčnicu prěnjeho naspomnjenja dźensnišeho města a wokolnych wsow. Před połdra tydźenjom bě měšćanski dźěl Němske Pazlicy na rjedźe. 90lětny regionalny hudźbnik Günter Wallner powěda ze swěćatym mjezwočom: „Sym často a z najwšelakorišich přičin w Němskich Pazlicach hrał. Tu zetkam wjele starych znatych.“

Rozžohnowacy so Kamjenski wyši měšćanosta Roland Dantz měješe we wobłuku swjedźenja wosebity nadawk, mjenujcy kače wubědźowanja zahajić. Tola wjesna rěčka, kotraž k Wulkemu hatej wjedźe, ma lědma wody. Někotryžkuli wopytowar so při tutym napohledźe prašeše, kak ma to hić? „Wočakńmy“, so wyši měšćanosta potajnostnje smějkotaše. Zhromadnje ze zarjadowarjemi ćisnje wón gumijowe kački do wody. A kaž wot kuzłarskeje ruki, so rěčka runje w tutym wokomiku pjelnješe. Wjele dźěći wyskachu. Kački nětko płuwachu. Hosćo ćehnjechu wot mosta k mostej, doniž njejsu kački k cilej dopłuwałe. A zaso bě wyskanje wulke, tónraz ze stron mějićelow kačkow. Wšako wulosowachu dosć atraktiwne myta, kaž na přikład dobropisy za hosćency, lěty z ultralochkim lětadłom abo kino.